'बिसिउँ वनीपिं लडाकुतय्त सैनिक ऐन कथं कारवाही'

येँ (सन्ध्या टाइम्स)/नेपाली सेनाया महानिर्देशनालय अन्तर्गत समायोजन जुइपिं माओवादीया लडाकुतय्त तालिमया झ्वलय् दथुइ हे बिसिउँ वन धाःसा इमित सैनिक ऐन लगेयायेगु जुइ धकाः नेपाली सेनाया छम्ह अधिकारीं धयादीगु दु ।

नेपाली सेनाया छम्ह उच्च अधिकारीं संचारकर्मीतलिसे खँ ल्हायेगु झ्वलय् वय्कलं धयादिल 'समायोजनया नितिं तालिम व ब्रिजिङ कोर्ष सुरु जुइ धुंकाः तालिम त्वःताः बिसिउँ वन धाःसा इमित सैनिक ऐन कथं कारवाही जुइ।' तर तालिम कोर्ष पूरा यानाः प्रक्रियाय् वने धुंकूपिं लडाकुतय्त नं नेपाःमि हे जूगुलिं एकीकृत माओवादीया बरिष्ठ उपाध्यक्ष मोहन बैद्य किरण पक्षधरं धयाच्वं थें बनपालेय् जक सीमित मयासे मेमेपिं सैनिकतय् सरह हे वृत्ति विकास, प्रमोशन यायेगु व सिंहदरवार व शान्ति सेनाय् वनेगु नितिं इमित छुं नं कथंया भेदभाव जुइमखु धाःगु दु ।

तत्कालया नितिं वन सुरक्षा, औद्योगिक सुरक्षा व दैवी प्रकोपय् खटेयायेगु धाःसां नं भविस्यय् इमित सिंहदरवार व हेडक्वाट्रय् खटेयायेगु जुइ धकाः धाःगु दु। आः नं राष्ट्रिय निकुञ्जय् खटेजुयाच्वंपिं सिपाइँत सिंहदरवार व सिंहदरवारय् खटेजुयाच्वंपिं निकुञ्जय् छ्वयेगु ज्या जुयाच्वंगु दु धकाः वय्कलं स्पष्ट यानादीगु दु ।

कार्तिक १५ गते एकीकृत माओवादीया अध्यक्ष प्रचण्ड, कांग्रेसया सभापति सुशील कोइराला, एमालेया अध्यक्ष झलनाथ खनाल व मधेसी मोर्चाया विजय गच्छेदारया दथुइ ७ बुँदाया सहमति जूगु इलय् ६५०० माओवादी लडाकुतय्त सेनाय् समायोजन यायेगु सहमति जुयाः व हे कथं वर्गीकरणया प्रक्रिया न्ह्याकेगु अवस्थाय् नेपाली सेनाया अधिकारीतय्सं अज्वःगु कथंया दृष्टिकोण तःगु खः धकाः छम्ह जर्नेलं थःगु नां सार्वजनिक मयायेगु सर्तय् जानकारी बियादीगु खः। सरकारं सेना समायोजन यायेगु निर्णययात नेपाली सेनां कार्यान्वयन यायेगु तर समायोजनया प्रक्रिया बारे अझ नं प्राविधिक जटिलता वयेफु धकाः वय्कलं धयादीगु दु। मेजरया लाइनय् दुपिं क्याप्टेनतय्गु बृत्ति विकासयात न्हूगु मेजरय् नियुक्तिं नं प्रभाव लायेफुगु जुयाः लडाकुतय्त बिइगु दर्जाया नितिं न्हूगु दरबन्दी सिर्जना यायेगु उपयुक्त जुइ धकाः नं धयादिल ।

७ बुँदाया सम्झौता १ (घ) य् धयातःगु दु 'सुरक्षा अंगया अधिकृत व मेगु दर्जाय् समायोजन यायेगु झ्वलय् आःया अधिकृत व मेमेगु दर्जाया व्यक्तित्वतय्गु बृत्ति विकासय् नकारात्मक असर मलाइगु कथं दर्जा निर्धारण यायेगु जुइ।' सैन्य अधिकारीया धापू कथं समायोजन जुइपिं अधिकृततय्गु नितिं न्हूगु दरबन्दी सिर्जना यात धाःसा जक पुलांपिनिगु बृत्ति विकासय् उकिं नकारात्मक लिच्वः लाकीमखु ।