संविधान बीत प्रचण्ड, चुनाव यायेत कांग्रेस
येँ (सन्ध्या टाइम्स)/धायेत ला माओवादी अध्यक्ष प्रचण्डं शान्ति सम्झौता लिपा थः हानं प्रधानमन्त्री जुइ मखु धकाः धयादीगु दु। तर अथे धाःसां आः राष्ट्रिय सरकार गठन जुल धाःसा उकिया नेतृत्व धाःसा अध्यक्ष प्रचण्डं याइगु प्रवल सम्भावना दुगु खँ सूत्रं धाःगु दु। वंगु वालय् न्हय्गू बुँदा दुगु शान्ति सम्झौता जूबलय् दलतय् दथुइ सत्ता हस्तान्तरण सम्बन्धी गोप्य समझदारी नं जूगु खँ सूत्रं धाःगु दु ।
सूत्रं धाः कथं संविधान च्वयाः तयार यायेगु ज्या सिमधःतले डा. बाबुराम भट्टराई हे प्रधानमन्त्री पदय् च्वनादी। संविधान तयार जुयाः उकियात जारी याये त्ययेकाः सरकार परिवर्तन यानाः राष्ट्रिय सरकार दयेकेगु सहमति जूगु दु। उगु राष्ट्रिय सरकारया नेतृत्व माओवादीयात बीगु यक्व सम्भावना दु। संविधान जारी यायेगु इलय् देशय् राष्ट्रिय सरकार गठन जूसा उकिं बांलाःगु सन्देश वनीगु जूगुलिं राष्ट्रिय सरकार दयेकाः जक संविधान जारी याये माली धइगु बिचारं उगु तयारी जूगु खः ।
संविधान जारी यायेधुंकाः वयां लिपा वहे संविधान अन्तर्गत जुइगु न्हापांगु चुनाव धाःसा कांग्रेस नेतृत्वया सरकारं याइगु खँ धाःगु दु। कांग्रेसं चुनावी सरकारया नेतृत्व याइगु जूगुलिं संविधान जारी याइगु राष्ट्रिय सरकारया नेतृत्व माओवादीं याइगु खँ सूत्रं धाःगु दु। आः माओवादीं नेतृत्व याइगु सरकार व कांग्रेसं नेतृत्व याइगु सरकारय् मेगु विपक्षी दल एमाले नं सहभागी जुइगु खँ दु। आः एमालें राष्ट्रिय सरकारया दावी मयासे निगुलिं पार्टीयात ग्वाहालि याइगु खँ नं सूत्रं धाःगु दु ।
