न्हापांगु हलिं नेवाः तःमुँज्याया लण्डन घोषणा (दस्तावेज)

नकतिनि लण्डनय् क्वचाःगु न्हापांगु हलिं नेवाः तःमुँज्या थीथी नेवाः विषयवस्तु कःघानाः लण्डन घोषणा जारी याःगु दु । थुगु दस्तावेजयात क्वय् न्ह्यब्वयाच्वना ।

लण्डन विश्वविद्यालय SOAS (School of Oriental and African Studies) बेलायतया सभाकक्षय् नेपाल संवत् ११३२ कछलाथ्वः ३-५ सन् २०११ अक्टोवर २९-३१ तक स्वन्हुयंक जूगु न्हापांगु हलिं नेवाः तःमुँज्याय् ब्वति कयापिं जिमिसं मंकाः कथं नेपालय् च्वनाच्वंपिं व नेपालंपिने च्वनाच्वंपिं नेवाःतय्गु सरोकारया विषयय् क्वय् न्ह्यथना कथंया खँय् सहमत जुयागु दु । नेपालय् छगू जाति विशेषपाखें राज्यसत्ताय् यकःति व मेमेपिं आदिवासी जनजातियात विभेद व सिमान्तकृत यानातःगु दु । नेपाःया राष्ट्रिय एकताया लागिं थुकिया विरोधय् सः थ्वयेकेत हिलंन्यंकया थीथी राष्ट्रिय अन्तरराष्ट्रिय खलःपुचःयात इनाप यानाच्वना ।

१. अन्तरराष्ट्रिय श्रम संगठन महासन्धी १६९ यात नेपाल सरकारं अनुमोदन यायेधुंकाः थ्व महासन्धी नेपाःया कानून सरह खः । थुकिया धारा २८.१ कथं नेपाःया आदिवासी जनजाति मस्तय्सं थःथःगु मांभासं शिक्षा कायेखनीगु व्यवस्था यायेगु भाला नेपाल सरकारया खः । अथे हे धारा २८।३ कथं आदिवासी जनजातिया भाषा संरक्षण व प्रवद्र्धनया अधिकारया सुनिश्चितता (Guarantee) बिइगु दायित्व नेपाल सरकारया खः । सरकारं याकनं थःगु भाला पूवंकुसें देय्या अन्तरराष्ट्रिय प्रतिष्ठा थकायेत इनाप यानाच्वना ।

२. नेपाःया प्रजातन्त्र लोकतन्त्र व गणतन्त्रया निंतिं जूगु थीथी आन्दोलनय् न्ह्यःने च्वनाः थःत पाःपिं नेवाःत थौंतक नं विभेदय् लानाच्वंगु दु । आदिवासी नेवाःतय्सं थःगु अस्तित्वया निंतिं संघीय लोकतान्त्रिक गणतन्त्र नेपाःया न्हू दयेकीगु संविधानय् नेवाःतय्गु स्वशासन व अग्राधिकार दइगु नेवाः स्वायत्त व स्वशासित प्रदेश व मेमेगु जातिया स्वशासित प्रदेश सुनिश्चित यायेत मदिक्क आन्दोलन न्ह्याकाच्वंगु दु । देय्दुने जुयाच्वंगु नेवाःतय्गु थ्व आन्दोलनप्रति जिमिसं समर्थन व ऐक्यवद्धता प्वंकुसें आन्दोलनयात न्ह्यज्याकेत जिमिसं फुगुचाःगु योगदान बिइगु प्रतिवद्धता प्वंकाच्वना ।

३. आदिवासी नेवाःतय्गु आदिभूमि दुनेया स्वनिगः लागा तच्वकं स्यना वनाच्वंगु वातावरणं यानाः थनया अमूल्य विश्व सम्पदा संकटय् लानाच्वंगु दु । विश्व सम्पदां जायाच्वंगु थ्व स्वनिगः संरक्षण व संवद्र्धनया पलाः याकनं ल्ह्वँसें थःगु अन्तरराष्ट्रिय भाला पूवंकेत नेपाल सरकारयात माग यानाच्वना ।

४. नेपाः सरकारं न्हियान्हिथंया सरकारी ज्याखँय् व सांस्कृतिक ज्याझ्वलय् नेपाल संवत्यात सरकारी संवत् कथं छ्यलेगु निर्णययात थुगु तःमुँज्यां लसकुस याना । थुगु निर्णययात तत्काल हे लागू यायेत जिमिसं इनाप यानाच्वना नापं छगू शदी न्ह्यवनिसें जवर्जस्ती लादे यानातःगु विक्रम संवत्यात सरकारी छ्यलाबुलां लिकायेत नं माग यानाच्वना ।

५. हलिं नेवाः दबू (WNO) या आज्जु धिसिलाक्क पूवंकेया निंतिं अथे हे १३० राष्ट्रय् न्यनाच्वंपिं नेवाःतय्त संगठित जुइत थ्व तःमुँज्यां दुनुगलंनिसें इनाप यानाच्वना ।

न्हिल्याः - ने.सं. ११३२ कछलाथ्वः षष्ठी मंगलवाः (November 1st, 2011 Tuesday)
हलिं नेवाः दबू
(World Newah Organization)

किपा - केशव महर्जन

More Stories Like this