थौं न्हापांगु गणतन्त्र दिवस
माओवादीपाखें बहिष्कार
यें (सन्ध्या टाइम्स) / गणतन्त्र दिवस थौं सुथंनिसें थीथी ज्याझ्वः यासें हन । तर थौं सरकारपाखें तिंख्यःया सैनिक मंचय् याःगु गणतन्त्र दिवसया मू ज्याझ्वः धाःसा प्रमुख प्रतिपक्षी माओवादीं बहिष्कार याःगु दु ।
देशय् गणतन्त्र पलिस्था जूगु दछि क्यंगु लसताय् सैनिक मंचय् जूगु ज्याझ्वःया मू पाहां गणतन्त्र नेपाःया न्हापांम्ह राष्ट्रपति डा. राम वरण यादव जुयादीगु खः । लिसें ज्याझ्वलय् उपराष्ट्रपति परमानन्द झा प्रधानमन्त्री माधव नेपाल नापं मेपिं सकलें संवैधानिक निकायया पदाधिकारीपिं मन्त्री व सभासद्तय् उपस्थिति दुगु खः । तर प्रमुख प्रतिपक्षी नेता माधव नेपाल नापं माओवादीया सुं हे सभासद्त उगु ज्याझ्वलय् मथ्यं । उगु ज्याझ्वलय् राष्ट्रपति व प्रधानमन्त्रीपाखें संवोधन याइगु ग्वसाः दु धाःसां उकिया ई धाःसा बियातःगु मदु ।
ज्याझ्वलय् नेपाली सेना सशस्त्र प्रहरी व जनपद प्रहरीया मार्चपास लिसें कृषिजन्य उत्पादनया प्रदर्शनी व येँया स्थानीय जनताया सांस्कृतिक झाँकी नं न्ह्यब्वःगु खः ।
थ्व लसताय् सर्गतय् सेनाया हेलिकप्टरं 'गणतन्त्र दिवस' धकाः च्वयातःगु ब्यानर ब्वयेकाः तःगू हे चक्कर चाःहीकूगु खः ।
गणतन्त्र दिवसया लसताय् माओवादीतय्सं धाःसा बिस्कं हे ज्याझ्वः यायेत्यंगु खँ सीदुगु दु । थ्व लसताय् उमिसं राजधानीइ छगू बिस्कं हे सभा व जुलुस यानाः गणतन्त्र दिवस हनेगु तयारी यानाच्वंगु खँ सीदुगु दु ।
मेखे थ्वहे लसताय् प्रधानमन्त्री माधव नेपालं येँया रत्नपार्क दुने गणतन्त्र स्तम्भया शिलान्यास याना-दिल । एमाले सरकार वयेसातकि थ्व गणतन्त्र स्तम्भ दयेकेगु धकाः निर्णय याःगु खः । तर एमाले सरकारया थ्व निर्णययात थीथी थासं धाःसा विरोध जुयाच्वंगु दु । थ्व गणतन्त्र स्तम्भ नारायणहिति दरवार दुने धस्वाकेगु धकाः न्हापा माओवादी सरकारं निणय यानातःगु खः । माओवादी सरकारं उकिया निंतिं ५ करोड तकाया बजेट नं फ्याना तयेधुंकूगु खः । तर एमालें उगु निर्णययात उल्टे यानाः रत्नपार्कय् स्तम्भ तयेगु निर्णय यात । लिसॆं रत्न-पार्कयात आः गणतन्त्र पार्क धकाः नां छुइगु निर्णय नं सरकारं याःगु दु । तर रत्नपार्कयात 'शंखधर पार्क' नां तयेगु धकाः एमालेया नेसं न्हूदँ समारोह समितिं न्हापा हे निर्णय याना तयेधुंकूगु दु ।
