आःयात सरकार गठनया खँ मल्हाये

स्वंगू तःधंगु दल व मधेसी मोर्चा दथुइ नकतिनि जूगु न्हय्गू बुँदाया सम्झौता लिपा आः राष्ट्रिय सरकारया गठन सुयागु नेतृत्वय् जुइ धइगु खँय् फरक व्याख्या सुरु जूगु दु। उगु सम्झौताया छगू बुँदाय् शान्ति व संविधान च्वयेगु ज्या सुचारु जुइवं उकिया नापनापं राष्ट्रिय सरकार गठनया ज्यायात न्ह्यःने यंकेगु खँ उल्लेख यानातःगु दु। तर राजनीतिक दलतय् दथुइ सम्झौताया मेमेगु बुँदायात कयाः स्वयां नं राष्ट्रिय सरकार गठन सम्बन्धी बुँदाय् अप्वः ध्यान केन्द्रित जूगु आभास वयाच्वंगु दु। आः गठन जुइगु राष्ट्रिय सरकारया नेतृत्व सुनां यायेगु? गुलिस्यां कांग्रेसं यायेगु धयाच्वंगु दुसा गुलिस्यां माओवादीं हे याइ धयाच्वंगु दु। माओवादी दुने नं डा. बाबुराम भट्टराईया वर्तमान सरकारं हे याइ लाकि हानं मेम्ह मनूया नेतृत्वय् सरकार गठन जुइ? थ्व खँयात कयाः नेतातय् दथुइ न्हय्गू बुँदे सम्झौताया व्याख्या हे थः यःयःथे याना हःगु दु। खतुं थ्व विवादया दथुइ नेपाली कांग्रेसया नेता रामचन्द्र पौडेलं मंसीर ७ गते न्ह्यः सरकार गठनया खँ हे ल्हायेगु जुइ मखु धयादीगु दु। थ्व इलय् वय्कःया धापू हे दकलय् महत्वपूर्ण खः। तर वय्कलं थथे धयादीगु नं शुद्ध मनं धाःसा मखु। यदि राष्ट्रिय सरकार हे गठन यायेगु भाला कांग्रेसयात वल धाःसा उकिया नेतृत्व शेरबहादुर देउवायात वनीगु जूगुलिं वय्कलं थथे धयादीगु खः। कांग्रेसं राष्ट्रिय सरकार दयेकूसा देउवां व बहुमतीय सरकार दयेकूसा पौडेलं नेतृत्व यायेगु धकाः निर्णय यानातःगु दु। अथे खःसां थौंया आवश्यकता धइगु सरकार गठनया बारे खँ हे मल्हायेगु खः। सरकार गठनया विवादं यानाः हे शान्ति व संविधानय् पंगः वयाच्वंगु खँयात लुमंके ।

More Stories Like this