झी जिलाजं भाजु बाबुराम भट्टराई

डा. सुमनकमल तुलाधर

थुगुसीया नेपाल संवत् ११३२ य् खुल्ला मञ्चया ज्याझ्वलय् अतिकं हे दुग्यंगु, ऐतिहासिक व गबलें हे ल्वःममनीगु सन्देश देय्न्यंकं जक मखु अन्तर्राष्ट्रिय जगतय् नं वंगु दु। यक्व यक्व सुभाय् व भिंतुना झी जिलाजं प्रधानमन्त्री व एकीकृत माओवादीया न्वकु डा. बाबुराम भट्टराईयात। थ्व सन्देशं प्रस्ट याइ कि वय्कः छम्ह दूरगामी व तीक्ष्ण बुद्धि दुम्ह व्यक्तित्व खः। तिंख्यलय् जूगु न्हूदँया उगु ज्याझ्वलय् वय्कलं नेवाः भासं भाषण जक बियादीगु मखु वय्कलं भाषणय् न्ववानादीगु खँ नं उलि हे क्वातुगु व दुग्यंगु हे खः। थुकिं सीदु कि वय्कलं देशयात म्वाकेत छु गुज्वःगु विकासया ज्या न्ह्याकेमाः। आर्थिक विकास व भौगोलिक विकास जक विकास मखु धइगु खँ वय्कःया भाषणं प्रस्ट जू। देशया संस्कृति हे मानव विकासया दुगः क्वँय् खः अले मानव विकास धइगु हे देशया विकास खः धइगु खँ थुइकाः सामन्तवादं ल्हाना वनाच्वंगु नेवाः संस्कृतिं हाकनं छक्वः छ्यं ल्ह्वने फइ ला धइगु आशा ब्वलंगु दु। सिंगापुरया प्रेसिडेन्टयात छगू देशया प्रमुखं "छं गथे यानाः देश विकास यायेगु? छंगु श्रोत व साधन छु?" धकाः न्यंबलय् लिसलय् धयादिल, "जिगु देशया भूमि दु, जिमि जनता दु व जनताया शक्ति दु। थ्व जनताया शक्तियात झीसं तिबः जक बीमाः।" तर दुर्भाग्यवश नेपाःया गौरब हलिमय् ल्यंकाच्वंपिं नेवाःतय्गु संस्कृतियात ध्याकुनय् लाकाः स्वन्ति नखःयात "तिहार व दिपावली" इ सीमित यानाः भैलोया प्रथायात जक न्ह्यब्वयेगु व नेपाल संवत्यात न्हियान्हिथं छ्यला वयाच्वंसां सरकारी रुपं आधिकारिकता मबीगु नेवाःतय्त जुयाच्वंगु दमनया छगू स्वरुप जक खः। थुगु दमनं जनताया शक्तियात तिबः बीगु मखु बरु विखण्डित यानाः झन जक मनोबल क्वकया बी। देश विकासया लागि सुयाके छु गुज्वःगु शक्ति दु, सामर्थ्य दु उकियात अझ ब्वलंकाः जनतायात आत्मबल बी फुसा जक देश भिनी। अमेरिकाय् धाइगु चलन दु unity in diversity. बिस्कं बिस्कंगु सामर्थ्य व शक्तियात ज्वःलाकाः छगू बांलाःगु समाज दत धाःसा जक बल्लाःगु व दुग्यंगु समाज मुनाः बल्लाःगु देश जुयाच्वने फइ। गथे क्यब बांलाकेत छगू हे जातया स्वांमा वा सिमां गबलें बांलाइ मखु। अथे धकाः न्ह्यःनेलाःथे न्ह्याःन्ह्याःथाय् पिनां नं ज्या ख्यले वइ मखु। बिस्कं बिस्कंगु स्वांमा, सिमात मिले चले यानाः पी फत धाःसा इलय्-ब्यलय् साः तयाः तिबः बी फुसा हे जक थ्व क्यब बांलाइ। थ्व फुक्क खँ थूपिं झी नेता जूसा जक झीगु देय् नं बांलाइ। सायद थुकिं हे थौं झीगु देशय् संघीयताया छलफल सुरु जूगु खः। थ्व छलफलयात सार्थकता बीत नं समाज, विकास, मानव अधिकारयात दुनुगलं निसें थुइकाः थः कतिलाकेगु भाव मदुपिं नेतातय्त झीसं सत्ताय् छ्वयेमाः। म्हिगः झी जिलाजं भाजुया भाषण न्यनाबलय् नेपालं थुज्वःम्ह नेता लुइकल ला धइगु आभास जू। खय्त ला थज्याःगु बचं बिउपिं नेतात न्हापा नं मवःगु मखु तर थ्व झी जिलाजं भाजु हे जूगुलिं छुं हिउपाःया निंतिं झीपिं आसाकुति जुयाच्वनागु खः। झी जिलाजं भाजु नापं म्ह्याय् मचा हिसिला व थुगुसी जूगु उगु ज्याझ्वःया ग्वसाः खलःयात नं अतिकं सुभाय् लिसें भिंतुना बियाच्वना ।

More Stories Like this