आयोगया पलेसा विज्ञ पुचः

प्रचण्ड न्युयोर्क ब्वये न्ह्यः हथासं निर्णय

येँ (सन्ध्या टाइम्स)/न्हूगु संविधानया राज्य पुनर्संरचनाया विषययात कयाः विज्ञतय्गु पुचः दयेकेत अन्तरिम संविधान-२०६३ यात हे संशोधन याइगु जूगु दु ।

थौं सुथय् च्वंगु संविधानसभाया संवैधानिक समिति अन्तर्गतया विवाद समाधान यायेत दयेकातःगु उपसमितिया बैठकं राज्य पुनर्संरचना सम्बन्धी विज्ञ पुचः दयेकेत संविधान संशोधन यायेगु निर्णय याःगु खः। अन्तरिम संविधानय् राज्य पुनर्संरचनाया लागिं बिस्कं आयोग दयेकेगु खँ उल्लेख यानातःगु दु। आः आयोगया पलेसा विज्ञ पुचः दयेकीगु जूगुलिं अन्तरिम संविधानया उगु धारा संशोधन यायेमाःगु खः। विज्ञ समिति दयेकेत संविधान संशोधन यायेगु उगु निर्णययात कन्हय् संवैधानिक समितिया बैठक च्वनाः अनुमोदन याइ धाःगु दु ।

संविधान संशोधनया ज्या धाःसा व्यवस्थापिका संसदं याइ। आः वइगु २५ गते च्वनीगु संसदया बैठकं संविधान संशोधन यासें विज्ञ पुचः नीस्वनेगु ज्या याइ धाःगु दु।
थुकिया निंतिं माःगु प्रक्रिया न्ह्याकेत सभामुख सुवास नेम्वाङलिसे सहलह ब्याकेगु जुइ खँ उपसमितिया बैठकय् वनाः वःम्ह एमालेया नेता माधव नेपालं संचारकर्मीतय्त कनादिल। संविधान संशोधनया निंतिं दुई तिहाई बहुमत आवश्यक दुगुलिं एकीकृत माओवादी, कांग्रेस, एमाले, व मधेसी मोर्चा नापं मेमेगु दलत नं तयार दुगुलिं संविधान संशोधन अःपुक हे जुइगु अवस्था दु ।

उपसमितिया ज्याकू सिंहदरवारय् च्वंगु बैठकं शासकीय स्वरुप व निर्वाचन प्रणाली बारे ब्वलनाच्वंगु मतभेद अन्त्य यायत दयेकातःगु कार्यदलयात नं सक्रिय यायेगु निर्णय याःगु दु। उगु कार्यदलय् कानून व्यवसायी समेत जुयाच्वंपिं सभासद्त अग्नि खरेल, सपना प्रधान मल्ल, राधेश्याम अधिकारी व लक्ष्मणलाल कर्ण च्वनाच्वंगु दु। संवैधानिक समिति अन्तर्गतया उपसमितिया संयोजक जुयाच्वंम्ह माओवादीया अध्यक्ष प्रचण्ड थौं हे न्यूयोर्क वनेमाःगु जुयाः थौं सुथय् हे उपसमितिया आकस्मिक बैठक च्वनाः उगु निर्णय याःगु खः ।

प्रचण्ड लुम्बिनी बृहत विकासया निंतिं अन्तर्राष्ट्रिय जगतया ग्वाहालि कायेत राष्ट्र संघया महासचिव वान की मुनयात नापलायेत न्यूयोर्कपाखे वनेत्यंगु दु। प्रचण्डं मुनयात थ्व हे कार्तिक २२ गते नापलायेगु ग्वसाः ग्वयातःगु दु ।

वंगु भदौ १४ गते संविधानसभाया म्याद स्वक्वःखुसी थप याये धुंकाः उपसमितिया बैठक स्वक्वः जक च्वंगु दुसा संवैधानिक समितिया बैठक धाःसा छकः जक च्वंगु दु। कांग्रेस व एमालें शान्ति प्रक्रिया ठोस रुपं न्ह्याः मवनेवं उप समितिया बैठक हे च्वनेगु जुइ मखु धकाः अडान कयाच्वंगुलिं छुं ई न्ह्यवंनिसें बैठक तकं च्वने मफयाच्वंगु खः ।