नेवाः प्रदेशया आन्दोलनयात ग्वाहालि यायेगु प्रतिवद्धता
लण्डन घोषणा जारी
येँ (सन्ध्या टाइम्स)/बेलायतया राजधानी लण्डनय् नकतिनि क्वचाःगु विश्व नेवाः सम्मेलनं 'लण्डन घोषणा' जारी याःगु दु। हलिं नेवाः दबू (वर्ल्ड नेवाः अर्गनाइजेशन) या ग्वसालय् वंगु कछलाथ्व ३ निसें ५ तक लण्डनय् न्हापांगु हलिं नेवाः सम्मेलन जूगु खः। सम्मेलन लिपा उकिया लिच्वः कथं न्यागू बुँदाया लण्डन घोषणा जारी याःगु खः ।
उगु घोषणाय् न्हूगु संघीय नेपाः दुने नेवाःतय् बिस्कं स्वायत्त व स्वशासित प्रदेश नं निर्माण यायेमाः धकाः नेवाःतय्सं न्ह्याका वयाच्वंगु आन्दोलनयात थःपिंसं फुगुचाःगु योगदान बीगु प्रतिवद्धता प्वंकातःगु दु। नेपाःया हरेक प्रजातान्त्रिक आन्दोलनय् न्ह्यःने लानाच्वंपिं नेवाःतय्त संघीय नेपाः दुने अग्राधिकार सहितया बिस्कं नेवाः स्वायत्त-स्वशासित राज्य दयेमाः धकाः नं उकी माग यानातःगु दु ।
घोषणाय् नेपाः सरकारं अनुमोदन यानातये धुंकूगु अन्तर्राष्ट्रिय श्रम संगठन महासन्धि १६९ आः नेपाःया कानून सरह जुइधुंकूगु कारणं थुकिया धारा २८.१ कथं आदिवासी जनजातियात थःथःगु मांभासं शिक्षा कायेगु व्यवस्था व धारा २८.३ कथं आदिवासी जनजातिया भाषा, संरक्षण व प्रवर्द्धन यायेगु दायित्व राज्ययागु जूगुलिं नेपाः सरकारं थ्व ज्या याकनं यायेमाः धकाः नं माग यानातःगु दु ।
अथे हे आदिवासी नेवाःतय् आदिभूमि स्वनिगःया वातावरण न्हियान्हिथं स्यना वनाच्वंगु व उकिं यानाः विश्व सम्पदाय् दुथ्यायेधुकूगु थनया सांस्कृतिक सम्पदात र्हास जुजुं वनाच्वंगुलिं उकिया संरक्षण व संवर्द्धन यानाः थःपिनिगु अन्तर्राष्ट्रिय भाला पूवंकेत नं राज्ययात इनाप यानातःगु दु ।
नेपाः सरकारं नेपाल संवत्यात सरकारी क्यालेण्डरय् नं दुथ्याकेगु धकाः थुगुसी याःगु निर्णययात लसकुस यासें घोषणाय् सदियौं न्ह्यवंनिसें नेपालय् लागू याना तःगु विक्रम संवत्या छ्यलाबुला चीका छ्वयेत नं माग यानातःगु दु। घोषणाया अन्तय् हलिं नेवाः दबूया आज्जु पूवंकेया लागिं विश्वन्यंकंया १३० गू देशय् न्यनाच्वंपिं नेवाःतय्त संगठित जुइत नं इनाप यानातःगु दु ।
