झिन्हु तक प्रचण्ड व किरणया कडा तयारी
येँ (सन्ध्या टाइम्स)/एकीकृत माओवादीया केन्द्रीय बैठक आः झिन्हु लिपा जक च्वनीगु जूगु दु। म्हिगः बैठक सुरु जक यानाः झिन्हुया लागिं स्थगित याःगु खः। उकिं आः झिन्हु तक अध्यक्ष प्रचण्ड व बरिष्ठ उपाध्यक्ष मोहन बैद्य किरण निगुलिं पक्षं थःथःगु आन्तरिक तयारी याइगु जूगु दु ।
अध्यक्ष प्रचण्ड थौं हे न्यूयोर्क वनेमाःगु नापं छुं दिं लिपा हे सार्क सम्मेलनय् ब्वति कायेत उपाध्यक्ष लिसें प्रधानमन्त्री डा. बाबुराम भट्टराई नं माल्दिभ्स वनेमाःगु जुयाः बैठक झिन्हुया लागिं स्थगित याःगु खः ।
म्हिगःया बैठकय् उपाध्यक्ष किरण पक्षं नकतिनि जूगु न्हय्गू बुँदाया शान्ति सम्झौताया विरोधय् थःपिनिगु झिगू बुँदाया फरक प्रस्ताव पेश याःगु खः। उपाध्यक्ष किरण व महासचिव रामबहादुर थापा 'बादलं' ल्हाःचिं तयातःगु उगु प्रस्तावय् पार्टीया नेतृत्वं भारतीय गुप्तचर संस्था 'र' लिसे रहस्यमय ढंगं नाप लाःगु व वयां लिपा सम्झौता जूगु द्वपं बियातःगु दु। लिसें कन्टेनरया ताःचा लःल्हाःगु गलत जूगु, बिप्पा सम्झौता राष्ट्रघाती जूगु नापं ७ बुँदाया सहमति खारेज यायेमाःगु माग नं उकी यानातःगु दु ।
