महाकाली अस्पतालय् मातृका माओवादीया सुधार अभियान
कञ्चनपुर (सन्ध्या टाइम्स)/ महाकाली अञ्चल अस्पतालय् जुयाच्वंगु अनियमिततायात पनाः स्वास्थ्य सेवायात क्वातुकेगु लागिं मातृका यादवया नेतृत्वय् दुगु नेकपा (माओवादीं) अभियान न्ह्याकूगु दु। माओवादीं लछि न्ह्यवंनिसें सञ्चालन याःगु भ्रष्टाचार विरोधी अभियान अन्तर्गत थौंकन्हय् थुगु अञ्चल अस्पतालयात उच्च निगरानीइ तयातःगु दु। जिल्ला संगठन समिति कञ्चनपुरया सेक्रेटरी परिवर्तनं अस्पतालय् बिरामीयात सेवा बीगु ज्याय् यक्व हे अनियमितता जुयाच्वंगु खने दुगुलिं अस्पतालयात उच्च निगरानीइ तया तइगु खँ कनादिल ।
अस्पतालय् असहाय कोष दुरूपयोग, आकस्मिक कक्षय् अहेबया मनपरि व कर्मचारीया माफियातन्त्रयात परास्त यायेत थ्व अभियान चले यानागु खँ माओवादीं धाःगु दु।
माओवादीं अनियमितता निगरानी यानाः तत्काल सुधारया लागि अस्पताल प्रशासनयात आग्रह याःगु दु। पार्टीया आग्रहयात बेवास्ता यानाः सुधारया ज्या मयात धाःसा प्रशासन कक्षय् तालं ग्वया बीगु ख्याच्वः नं उगु पार्टीं बिउगु दु। प्यंगू दशकंनिसें सञ्चालन जुयाच्वंगु थ्व अस्पतालय् १९ म्ह डाक्टरया दरबन्दी दुसां छम्ह हे जक चिकित्सक दु।
