नेवा: भासं या:गु सम्बोधनया लहर
नेपाल संवत् ११३२ न्हूदँया न्हि । तिनिख्य:या चकं दबुली न्हूदँया मू समारोह जुयाच्वंगु । उगु समारोहया मूपाहाँ प्रधानमन्त्री डा. बाबुराम भट्टरार्इ । समारोह समितिया नाय: भाजु पद्मरत्न तुलाधरं ज्यापु समाज यलं पिथंगु कचवंया सवालय् थ:गु धापू न्ह्यथने धुंका: प्रधानमन्त्री थुज्व:म्ह झायाच्वनादीगु दु, वय्क:या र्इ झीसं आपा: कायेमज्यू, वय्क:यात ताबाय्त पीके मज्यू धका: धासें न्ववायेत र्इ बियादिल । अनंलि प्रधानमन्त्री डा. बाबुराम भट्टरार्इ नं नेपाल भासं हे भाषण ब्वना: न्यंकेगु सुरु यानादिल । आपा:सिनं तायेकल, छत्वा:चा ब्वनेधुंका: वय्कलं खँय्भासं हे न्ववानादी । तर अथे मजू, वय्कलं नेवा: भासं हे भाषण न्यंका: थ:गु धापू क्वचायेकादिल । थुकिं सकलें हर्षविभोर जुल । सकसितं लय्ता: वल । नेपाल संवत् राष्टि्रय न्हूदँ समारोह समितिया नाय: पद्मरत्न तुलाधरं वय्क: प्रधानमन्त्रीजुयात विशेषकथं हे च्वछायादिल । प्रधानमन्त्री डा. बाबुराम भट्टरार्इ नं मुक्कं नेपालभासं न्ववानादीगु खँ उघि्रमय् हे चर्चा परिचर्चाया विषय जुल । सकसिनं थ्व न्हूगु व लसताया खँ जुल धका: थ्व खँयात बय्बय् यात । आपा:सिनं वय्क:यात सुभाय् नं बिल । नेपाल संवत्या आन्दोलन चकं दबुली थ्यंगु इलय् प्रधानमन्त्री हे मुक्कं नेवा:भासं न्ववा:गु धइगु निश्चित रुपं एेतिहासिक खँ ख: । तर दु:खया खँ प्रधानमन्त्री न्ववा:गु भाय् मथुया: ख:ला वा नेपालभाषा प्रति बेक्व: मिखा तया: प्रधानमन्त्रीं न्ववा:गु खँ मिडियाय् अपाय्च्व: प्रचारप्रसारय् मव: । प्रधानमन्त्रीं डा. बाबुराम भट्टरार्इ नं उकथं सार्वजनिक नेपा: भासं सम्बोधन या:गु धइगु खँ व्यक्तिया खँ मखु, आधिकारिक खँ हे ख: । झीथाय् आ:तक थ:थ:गु मातृभाषां सपथ नयेगु खँयात कानुनत: मान्यता दयेधुंकूगु दु । थ्व इलय् सरकारया आैपचारिक खँत नं नेपालभाषां नं वयेमाल धइगु झीगु माग दयावयाच्वंगु दु । थ्व इलय् प्रधानमन्त्री डा. बाबुराम भट्टरार्इ नं आधिकारिक रुपं न्ववा:गु खँ आधिकारिक दस्तावेज हे माने यायेमा: । अथेजूगुलिं नेपालभाषायात नां जकया राष्टि्रय भाषा मखु, व्यावहारिक रुपं सरकारी ज्याखँय् नं प्रयोगय् हयगु दिशापाखे थुकिं छगू जगया रुपय् ज्या यायेमा: वा झीसं थुकियात दसु दयेका: न्ह्या: वने फयेकेमा: । हानं प्रधानमन्त्रीया थ्व भाषण धइगु मुक्कं भाषण जक मखसें थुकी निगू सरकारी निर्णयया जानकारी नं दुथ्यानाच्वंगु दु । न्हापां ला पद्मरत्न तुलाधरया अध्यक्षताय् संवत् सम्बन्धी अध्ययन नीस्वनेगु ज्या जूगुया जानकारी थुकी दुथ्याना च्वंगु दु धा:सा मेगु आ: पिदनीगु सरकारी क्यालेण्डरय् नेपाल संवत्यात नं ला नापं दुथ्याकेगु खँया जानकारी नं थुकी दु । थुकथं थ्व भाषण तसकं हे लसकुस याये बह:गु खँ जूगु दु ।
News Location:
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
