न्हूगु कथंया न्हूदँ
थुगुसीया न्हूदँ न्हूकथं हे हनेगु ज्या जूगु दु । दकलय् न्हापां ला नेपाल संवत् राष्टि्रय न्हूदँ समारोह समितिया गठन हे न्हूगु खँ ख:, छाय्कि थौंतकया न्हूदँ नेपाल भाषा मंका: खल:या ग्वसालय् जुयावयाच्वंगु ख: । थुगु हे इलय् कुमारी ख: सालेगु लँपु दुने अर्थात् दुनेया शहर दुने जक लिकुनाच्वंपिं नेवा:तसें उगु घेरायात तछ्याना: तिखिख्य:या चकं दबुली वना: न्हूदँ हं वन, थ्व नं न्हूदँया न्हूगु ज्या जुल । अन्तत: ३२ दँतकया बसन्तपूया प्रस्थान बिन्दु ला माने यायेगु ज्या जुल तर अन्तत: न्हूदँया मूल समारोह तिनिख्य:या चकं दबुली जूवन । थ्व न्हूगु खँ जक मखु, समारोह समितिया नाय: भाजु पद्मरत्न तुलाधरं धयादी थें घेराबन्दी वा प:खा: तछ्यायेगु नं ज्या ख: । थुगु हे दबुली मूपाहाँकथं झायादीम्ह प्रधानमन्त्री डा. बाबुराम भट्टरार्इजुं मुक्कं नेवा: भासं थ:गु भाषन न्यंकादीत, थ्व नं न्हूगु हे खँ जुल । थ्वयां न्ह्य: गैरनेवा:तसें थुकथंया मञ्चय् न्ववाये बलय् न्हापलाक्क छगू वा निगू वाक्य जक नेवा: भासं न्ववाइगु लिपा वना: खँय् भासं न्ववाइगु ख:, तर डा. बाबुराम भट्टरार्इ थुज्व:म्ह प्रधानमन्त्री जुयादिल, गुम्हस्यां मुक्कं हे नेवा: भासं न्ववानादिया: थुकथं न्ववाइम्ह न्हापांम्ह गैर नेवा: जुयादिल ।
खँ थुलि जक मखु, मेपिं गैर नेवा:तसें आ:तक नं नेपालय् थीथी जाति, भाषा, संस्कृति दुगुली नेवा:तय्गु संस्कृति त:मि जक धया: नेपाल संवत्यात नं अप्रत्यक्ष रुपं नेवा:तय्गु जक संवत् धका: धायेत स्वइ, तर डा. बाबुराम भट्टरार्इया भाषणय् थ्व खँ स्पष्ट रुपं थ्व संवत् नेवा:तय्गु जक संवत् मखु, सकल नेपा:मितय्गु संवत् ख:, नेवा:तसें ला थुकिया आन्दोलनया अगुवाइ जक यानाच्वंगु ख: । न्हापा जूसा प्रधानमन्त्री वया: न्हूदँया दबुली समिति दयेकेगु आश्वासन बिया थकीगु ख: । न्हापांनिसें आश्वासन जक बीगु जूगुलिं थुगु खँग्व: हे मनूतय्त लुइमखया: थगुने उबलय्या प्रधानमन्त्री माधव कुमार नेपालं ला थ्व आश्वासन जक मखु, पूरा प्रतिबद्धता हे जुल, छिकपिसं खँ हयादिसँ धयाथकूगु ख: । तर थुपालय् न्हूदँया दबुली आश्वासन मखु, संवत्सम्बन्धी समिति हे गठन जूगु जानकारी प्रधानमन्त्रीं बियादिल । थ्व नं न्हूगु हे खँ जुल । थुकथं थुगुसीनिसें न्हूदँ हनेगु ज्याय् न्हून्हूगु आयाम थुपालय् खनेदत । वहे झ्वलय् चकं दबुली खनेदुगु विवाद नं सकसियां नितिं न्हूगु हे जुल । ज्यापु समाज यलया प्रतिनिधियात दबुली मस:तू धइगु खँया विवादं गुबलें मजूकथंया लू मनूतसें खन । तर न्हूकथं न्ह्यायेगु इलय् थुकथंया मगा:मचा: जुइगु स्वाभाविक हे खँ ख:, थुकी अजू चायेमा:गु छुं हुनिं मदु ।
न्हूगु ज्या व परिवर्तन जुइगु इलय् स्वभाविक रुपं पुलांगु स्वरुप हिले मालीगु व थुकथं हीकीगु ज्या बाध्य जुया: नं याये मालीगु ख: । न्हापा न्हापाया न्हूदँ फुक्क क्षेत्रया व्यक्तितय्गु, संघसंस्थातय्गु सरोकार क्यनेगु थाय्कथं जुयाच्वंगु मखसें न्हूदँ उत्सवया रुपय् छन्हु जक न्यायेका: परम्परागत कथं हे ज्याझ्व: जुयावयाच्वंगु ख: । तर थुपालय् न्हूदँ विशेषत: नेवा:तय्गु खल:पुच:, संघसंस्था, व्यक्तितय्गु नितिं त:धंगु सरोकारया विषय जूवंगु दु । थ्व हे नं परिवर्तनया झ्वलय् खनेदुगु सकारात्मक खँ ख: । मेता न्हूदँ समारोह समिति राष्टि्रय समारोह समिति धाये धुंका: वइगु न्हि ११३२ या दुने थ्व समारोह समितियात गैर नेवा:तय्त दुथ्याका: राष्टि्रय रुप बीगु ज्या ल्यं हे दनि । न्हूदँ उत्सव ख: कि आदिवासी जनजाति दुने झी नेवा:तय्गु नितिं नेवा: आन्दोलनया छगू त:धंगु मञ्च ख: थ्व खँय् नं छलफल यायेमा:गु खनेदु । नेवा:त न्हूदँ बलय् छन्हु जक दनीपिं धका: द्वपं बीगु ज्या गैर नेवा:तय्गु जक मखु स्वयम् नेवा:तय्सं हे बियावयाच्वंगु परिवेशय् झीसं लिस: बी मा:गु थुलि हे दु कि दच्छियंकं नेवा: भाय्, नेवा: साहित्य अले नेवा: आन्दोलनय् सनाच्वपिं नेवा:त उत्कर्षय् थ्यनीगु न्हि जक न्हूदँ ख: । अले न्हूदँया थुगु आन्दोलन दच्छिया छक: जक दनीपिं नेवा:त धका: बियावयाच्वंगु द्वपं पाय्छि मखु धइगु तर्क नं झीसं तयेफु । व ख: अन्ततोगत्वा: ३२ दँ न्ह्य:निसें न्हूदँया भिंतुना धका: सांस्कृतिक र्यालीया रुपय् न्ह्याकाच्वंगु आन्दोलनं हे नेपाल संवत्या प्रवर्तक संखधर साख्वा:यात राष्टि्रय विभूति घोषणा याकल । नेपाल संवत्यात राष्टि्रय संवत्या घोषणा याकल । थ्व घोषणा लिपा आ: नेपाल संवत्यात सरकारी क्यालेण्डरय् तयेगु निर्णय याकल । थुलि जक मखु नेपाल संवत्या छ्यलाबुलाया नितिं नेपाल संवत् अध्ययन व सुझाव आयोग गठन जुल । थुलि जक मखु संखधरया नामय् प्रतिष्ठान चायेकेगु घोषणा जुल । नेवा: संघर्षपाखें प्राप्त जूगु थ्व अधिकारयात झीसं गुलितक संरक्षण यायेफइ झीगु नितिं बरु आ: थ्व च्यूता:या विषय जूगु दु । मेता खँ ला नेपाल संवत्या न्हूदँय् राष्ट्रया कार्यकारी प्रमुखकथं २०४६ सालया आन्दोलन लिपा बहुदलीय व्यवस्थाया प्रधानमन्त्रीनिसें संघीय लोकतन्त्र स्थापनालिपाया प्रधानमन्त्रीतक न्हूदँया दबुली वया: थ्व सम्वत्या महत्व व गरिमा बीगु ज्या जुयाच्वन । थौं वया: नेवा:तय्सं संरक्षण यानाच्वंगु नेपाल संवत्या न्हूदँया ज्याझ्वलय् प्रधानमन्त्रींतकं नेवा: भासं सम्बोधन यायेगु ज्या जूगु दु । थ्व चा:चू उपलब्धि मखु । उकिं झी आ:तक यानाच्वनागु संघर्ष फगत सितिं वंगु संघर्ष धका: धायेगु उपयुक्त जुइमखु । बरु न्हूगु परिवेशय् न्हूकथं गुकथं न्ह्यायेगु, नेवा: आन्दोलनयात व्यापकरुपं गुकथं यंकेगु व झी दुने दयाच्वंगु व्यक्तिवादी राजनीति व चीधंगु घेराय् लानाच्वनेगु प्रवृत्तयिात गुकथं चीकेगु थ्व खँय् गम्भीर जुया: ध्यान बिल धा:सा वइगु न्हूदँ ११३३ थ्व दँसिबें नं त:जिक हनेफइ । उत्पीडनय् लानाच्वंपिं झी नेवा:तय्सं थ:गु शक्ति मानव सागरया रुपय् क्यनेफइ । न्हूदँया लसताय् झीसं थ्वहे आशिष याये ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
