असनय् अनुगमन टोली वःबलय्...

शीला साय्मि

थःपिनि पीदँ न्ह्यवंनिसेंया ख्याति घौछिं हे नष्ट यायेगु कुतः जूगु व मिडियां एकतर्फी खँ न्यनाः थःपिंत अन्याय याःगु खँय् व्यापारी भाजु सजिबया गुनासो दु ।

थम्हं ध्यबा पुलाः न्यानागु सामान स्वस्थ व ताजा जुइमा धइगु ला हरेक गाहाकिया मनतुना जुया हे च्वनी। उकिसनं नयेगु ज्वलं ला झन हे प्राथमिकताय् लाइगु जुल। अथे खःसां व्यापारीत न्ह्याबलें गाहाकितय्त झंगः लायेगु कुतलय् हे जुयाच्वनीगु झीसं खं। इमिसं गाहाकितय्त ध्वं लायेगु बानी न्हापांनिसें आःतकं त्वःतूगु मदु। सायद त्वःती नं मखु। गाहाकितय्सं सह याये मालाच्वंगु व्यापारीतय्गु थुज्वःगु हे व्यवहारयात ध्यानय् तयाः लिबाक्क हे जूसां छुं ई न्ह्यवंनिसें वाणिज्य विभागं थाय्थासय् अनुगमन पुचः छ्वयाः खाद्य वस्तु बिक्रीया अनुगमन याकाच्वंगु तसकं च्वछायेबहः जू। जनताया विषयय् सरकारं चिउताः प्वंकूगुया थ्व छगू ज्वलन्त दसु खः ।

तर फुक्कं खँ थःपिंसं धयाथें गन जू धकाः। वंगु असोज ३० गते सोमवाः कुन्हु न्हिनसिया २ बजे असंया न्यागू मसला व किराना पसलय् कमलबहादुर थापाया नेतृत्वय् अनुगमन पुचः वःगु खः। भाजु सजिवरत्न बज्राचार्य, वीरेन्द्र तुलाधर, पूर्णभक्त धौमडेल, प्रकाशमान वैद्य, पुष्परत्न तुलाधरपिनिगु पसलय् उगु टोलीं अनुगमन यात।
सजिवरत्न बज्राचार्यया पसलय् छम्ह मनू वयाः सामानया भाः न्यन। व्यापारीं भाः कन। उम्ह गाहाकिं छक्वलं 'ख्वाः स्वयाः भाः तयेगु ला?' धकाः हक्कल अले 'मूल्यसुची ग्व?' धकाः न्यन। व्यापारीया उकुन्हु मूल्यसूची खाये नं ल्वःमंगु जुयाच्वन। काचाकाचां लिकयाः क्यन। फर्म रेजिष्टर जूगु दु लाकि मदु धकाः नं न्यन। खुद्रा व्यापार संघय् दु धायेवं खुद्रा व्यापार संघ धइगु छु धकाः न्यन। व्यापारी अलमल जुल। खुद्रा व्यापार संघ धइगु हे मसिउम्ह गुज्वःम्ह निरीक्षक जुल थ्व? नगरपालिका व खुद्रा व्यापार संघय् दर्ता जूगु भ्वं क्यंक क्यंकं हे 'दर्ता छैन' धकाः च्वया यंकल।
भ्याकुम पाय्क छोडा ल्ह्वनाः मिडियायात क्यनाः 'मूल्य पनि नभएको, पुरानो प्याकेट' धकाः धाल। विदेशी सामानय् मू च्वयेम्वाः, भ्याकुम पाय्क सामान अथें हे काचाकुचु जुइ धकाः धायेक धायेकं थःपिनिगु खँ न्यँ हे मन्यँसे एकतर्फी खँ न्यनाः भिडीयो खिचे याना यंकल। उमिगु हे पुचलं वःम्ह छम्ह मनुखं अन्तर्वार्ता नं बिल। "पेस्ता खायो भने भित्र खोक्रो, काजु खायो भने गन्हाउने" धया बिल ।

थःपिनि पीदँ न्ह्यवंनिसेंया ख्याति घौछिं हे नष्ट यायेगु कुतः जूगु व मिडियां एकतर्फी खँ न्यनाः थःपिंत अन्याय याःगु खँय् व्यापारी भाजु सजिबया गुनासो दु।
अथे हे पुष्परत्न तुलाधर व वीरेन्द्र तुलाधरया पसलं धः ज्वनावन। ब्याण्ड जुइधुंकूगु धः धकाः खुला न्ह्यः जक नापतौल विभागं निरीक्षण यानाः छाप तःगु म्हासुगु धः ज्वना वन। ब्याण्ड जूगु धः इन्डियन खः तर थ्व खँ उगु टोलीं मसिउ। स्वन्हु लिपा हाजिर जू वयेगु पत्र बियाः टोली वन ।

स्वन्हु लिपा वाणिज्य विभागया हाकिम निरीक्षण अधिकृत कमल थापा नापलाः वन। छम्ह छम्ह यानाः जक हाकिमया क्वथाय् वा धकाः उजं बिल। व्यापारीतय्सं 'जिपिं न्याम्हेसिगुं पसलय् छत्थुं हे टोली वःगु खः, उकिं जिपिं नापं हे वनेगु' धकाः न्याम्हं नापं दुहां वन। खँल्हाबल्हा जुल। खरिद बिल, प्यान बिल, दर्ता जुयाच्वंगु भ्वं, धक, तराजु नवीकरणया भ्वं दक्वं बुझे यायेधुंकाः सामानय् प्राइस स्टीकर व एस्पायर डेट कन्हय्निसें तयेगु धाल। लिसें 'पुरानो भए वा त्रुटि भए पत्राचार गर्नु' धकाः लित छ्वया हल ।

थन व्यापारीतय्गु यक्व हे गुनासो दु, गुगु हाकिमयात नं उमिसं कनावःगु खः। नयेगु सामान उमिसं पसलय् वयाः ज्वं वइ। थ्व सामान पसलय् थ्यने न्ह्यः भंसारया गोदामय् लानाच्वंगु दइ। निरीक्षण टोलीं अन स्वः वनी मखु। न्हिंन्हिं अत्तापत्ता हे मदयेक थाय् हिलाः पसः तया जुइपिं बँपसल्यातय्त थिउगु मखु। काउली किलों १२० काःबलय् व ख्यें छगःया च्यासः काःबलय् अनुगमन याः मवं। तर पुर्खांनिसें चले यानाच्वंगु येँदेय्या रैथानेतय्गु पसलय् छक्वलं अनुगमन जूगुया रहस्य छु खः? थ्व संयोग जक खः लाकि थुकिया लिउने मेगु नं छुं दु? व्यापारी सजिवरत्न वज्राचार्यया न्ह्यसः दु ।

अथे हे भाजु वीरेन्द्रया धापू कथं अनुगमन टोली वयेमाः खः, अझ फुसा लछिया छक्वः हे वःसा बांलाः। तर उकी वइपिं मनूत दक्ष जुइमाः, गुम्हसिके थम्हं अनुगमन यायेत्यनागु विषयय् पूर्ण जानकारी नं दयाच्वनेमाः ।

More Stories Like this