आईओसीं आपूर्ति क्वपालेवं निगमया पेट्रोल मौज्दात म्हो जुल

येँ(सन्ध्या टाइम्स)/नेपाल आयल निगमं तयातःगु पेट्रोलया मौज्दात म्हो जूगु दु। भारतीय आयल निगम (आईओसीं) पेट्रोल आपूर्ति क्वपालेवं नेपालय् पेट्रोल आयात व आपूर्ति याना वयाच्वंगु छगू जक अधिकार प्राप्त संस्था निगमया पेट्रोल मौज्दात म्हो जूगु खः।
आयल निगमयाके कुल पेट्रोल भण्डारण क्षमता न्हय्निद्वः किलो लिटर दुगु खःसा आः वयाः झिंखुद्वः किलोलिटर स्वयां नं म्हो मौज्दात दुगु स्रोतं न्ह्यथंगु दु। निगमयाके आः दुगु पेट्रोल छवाः तकया निंतिं जक आपूर्ति यायेत गाः।
निगमया कथं पेट्रोलियम पदार्थया खपत लय् छगू लाख किलोलिटर जुयाच्वंगु दु। उकी मध्ये पेट्रोल झिंन्हय्द्वः लिटर, डिजेल ख्वीद्वः लिटर, मचिकं प्यद्वः लिटर व हवाई इन्धन स्वसःत्या किलोलिटर व एलपीजी ग्यास झिंखुद्वः टनया खपत जुयाच्वंगु दु।
नेपाल आयल निगमं वंगु लाय् जक भारतीय आयल निगम (आईओसी)यात बक्यौता वापत स्वीन्यागू करोड भारतीय ध्यबा भुक्तानी याःगु खः। निगमं आईओसीयात माक्व भुक्तानी याये मफुगुलिं पेट्रोल आपूर्ति क्वपाःगु निगमया प्रवक्ता मुकुन्द ढुंगेलं कनादीगु दु।
निगमं थ्व स्वयां न्ह्यव थीथी वाणिज्य बैकपाखें त्यासा कयाः छगू अर्ब स्वयां अप्वः आईओसीयात बक्यौता भुक्तानी याःगु खः। निगमं लिपांगु इलय् आईओसीयात याःगु भुक्तानी लिपा छ्वयाहःगु पेट्रोलया न्हूगु भाःकथं आः निगमया द्यापं थहां वनाः ग्वीगू करोड न्यागू लाख तका थ्यंगु दु। आईओसीं लय्पतिकं अंग्रेजी लाया न्हापांगु न्हिकुन्हु पेट्रोलियम पदार्थया भाः छ्वयाहयेगु यानाच्वंगु दु।
निगमं पेट्रोलियम पदार्थ विक्री वितरण वापत फये मालाच्वंगु द्यापं म्हो यायेत सरकारयाके कयातःगु त्यासा जक च्यागू अर्ब थ्यने धुंकूगु दु।