प्यालेष्टाइन-इजरायल कचवंया बाखं

डी. आर. खड्गी

'सन्ध्या टाइम्स'या ब्वँमिपिंसं स्वदेशी स्वयां अप्वः विदेशी च्वसु ययेकूगु प्रतिक्रिया जिगु निंतिं हःपाः जूगु दु। जिं विशेष यानाः अति चर्चित विदेशी खबरयात अप्वः ध्यान बियाच्वना। 'सन्ध्या टाइम्स'य् जिं करिब स्वदँ न्ह्यः हे प्यालेष्टिनी विषययात कयाः च्वये धुनागुलिं हाकनं लिसा कयाः मच्वयागु खः। तर ब्वँमिपिनि रुची कथं हाकनं जिं प्यालेष्टीनी विषययात कयाः च्वयेगु कुतः यानाच्वना। प्यालेष्टाइन बारे स्वये न्ह्यः यहुदी जातिया बारे छुं खँ सीकेगु आवश्यक जुइ ।

विश्वयुद्ध सुरु जुइ न्ह्यः युरोपय् राष्ट्रियता व जातीय भावना विकास जुयाच्वंगु खः। अझ राष्ट्रियता स्वयां नं जातीयताया नारा न्ह्यानाच्वंगु खः। विश्वयुद्ध सुरु जुइ न्ह्यः युरोपय् थीथी जाति दथुइ बांलाःगु स्वापू विकास जुयाः जातीय एकता बल्लानाच्वंगु खः। लिपा छगू जातिं मेगु जातियात घृणा, शोषण व दबावय् तयेगुपाखे ध्यान केन्द्रित जुयाच्वन। युरोया जाति मध्ये यहुदीयात चलाख व धूर्त जाति धाइ। थ्व जातिया दथुइ एकता तसकं क्वातुयाच्वन। थ्व जाति सक्षम व सिर्जनशील जाति नं खः। थुपिं मेमेगु जाति स्वयां धनी व शक्तिशाली जुयाच्वन। थ्व जाति धनी व शक्तिशाली जुया वंलिसे अहंकार नं अप्वया वन। थुमिगु मुख्य लक्ष्य धइगु मेगु जातियात कंगाल यानाः थः धनी जुइगु खः। थ्वहे कारणं युरोपया बहुसंख्यक जाति गरीब जुयाच्वंगुलिं देय्या अर्थतन्त्र कमजोर जुजुं वन। गरिबीं यानाः गैर यहुदी जातिं झन झन दुःख, कष्ट, पीडा भोगे याये माल। वहे इलय् विश्व प्रख्यात च्वमि शेक्सपियरं यहुदी जाति बेइमान, धोकेबाज, शोषक, अप्वः ब्याज काइपिं, निर्दयी, कन्जुस व देशयात माया मयाइपिं धकाः च्वयेसातकि युरोपया बहुसंख्यक जनतां यहुदी विरुद्ध अभियान सुरु यात। जर्मनी व फ्रान्सय् जनतां उपिं विरुद्ध राष्ट्रवादी अभियान न्ह्याकल। थ्व निगुलिं देशं यहुदीत राष्ट्रघाती धकाः देशं पितिनेगु सुरु यात। जर्मनीया राष्ट्रवादी नेता हिटलरं देशघाती द्वपं बियाः यहुदीतय्त स्यायेगु तकं यात। सारा युरोपय् यहुदी विरोधी लहर वःगुलिं थःगु ज्यान रक्षाया लागिं यहुदीत विस्थापित जुइत बाध्य जुल। व हे यहुदी जाति लिपा इजरायल वनाः इजरायलयात शक्तिशाली देशया रुपय् निर्माण यात। यहुदीत इजरायल जक मखु जःलाखःला अरब राष्ट्रय् नं दुहां वन। अरब राष्ट्रय् नं यहुदीत छप्पँ जुयाः छगू हे थासय् च्वनाः कडा मेहेनत यानाः थःगु आर्थिक स्थिति सुधार यानाच्वन। यहुदीत धनी व शक्तिशाली जुया वंगुलिं अरबया मुस्मांतय्सं हेपे याये व ख्याये मफुत। यहुदी जाति मेहेनती, सिर्जनशील व राजनीतिक चेतना दुपिं जूगुलिं अरब देशय् नं शक्तिशाली जुयाच्वने फत। अरबया छगू देय् लेबनानय् राष्ट्रपति क्रिश्चियन व प्रधानमन्त्री जक अरब मूलया मुस्मां जुइगु परम्परा थें जुयाच्वंगु खः। यहुदीत प्यालेष्टाइन राज्यय् नं आर्थिक व राजनीतिक रुपं शक्तिशाली जुया वःगु खनेवं प्यालेष्टीनी मुस्मांत थारा न्हुल। अरब मुस्मांत यहुदी जाति विरुद्ध कुहां वयाः हत्या व हिंसा तकं सुरु यात। प्यालेष्टीनी राज्य नं यहुदी जाति व मुश्लिम जातिया दथुइ सन् १९५६-१९६७ तक गृह युद्ध तकं जुल। आखिरय् इजरायलं सन् १९६७ स प्यालेष्टीनीतय्त समर्थन व सहयोग यानाच्वंपिं जोर्डन, सिरिया व इजिप्ट विरुद्ध युद्ध यानाः अरब देशया यक्व भूभाग त्याकेत ताःलात। इजरायलं सिरियाया गोलान हाइट इजिप्टया स्वीज नहरया भू-भाग व जोर्डनया भू-भाग नापनापं प्यालेष्टाइनया फुक्क भाग कब्जा यानाः प्यालेष्टीनीतय्त तहसनहस यानाबिल। प्यालेष्टीनीतय्सं नं इजरायल विरुद्ध जेहाड घोषणा यात। ७० या दशकय् प्यालेष्टीनीतय्सं ल्वाभःया बः कयाः आपालं इजरायलीतय् अपहरण, हत्या, यानाः इजरायलय् आतंक सिर्जना याना बिल। तर लिच्वः झन अःखः जुल। अर्थात थुकिं यानाः प्यालेष्टिनीतय्त विश्वं आतंकवादी घोषणा यानाः घृणा याना हल ।

अरब राष्ट्र व इजरायल दथुइ जुइगु युद्धया कारण नं धर्म हे खः। प्यालेष्टिनी राज्यं यहुदी जातियात पितिनाः स्वतन्त्र व मुक्त प्यालेष्टाइन पलिस्था यायेत इजिप्ट, सिरिया व जोर्डनं युद्ध याःगु खः। तर इजरायल लिसे जूगु उगु युद्धय् सिरिया, जोर्डन व इजिप्टं थःगु हे यक्वं भूभाग गुमे याये माल। व इलय् इजिप्टया राष्ट्रपति अनवर सादातं 'आः युद्ध मखु शान्तिं समस्या समाधान याना वनेगु' धकाः इजरायलनाप शान्ति सम्झौता यानाः थःगु छुं छुं भूभाग लित कायेत ताः नं लात। तर इजरायलनाप शान्ति सम्झौता यात धकाः कट्टरपन्थीतय्सं राष्ट्रपति सादातयात स्याना बिल। लिपा जोर्डनं नं इजरायलनाप शान्ति सम्झौता यानाः थःगु छुं भूभाग लित कायेत ताःलात व इजरायलया अस्तित्वयात स्वीकार यात। शान्ति सम्झौता याकाः इजरायलया सुरक्षा व अस्तित्व स्वीकार याकेगुली अमेरिकां मू भूमिका म्हितूगु खः। यदि कुटनीतिक चाल म्हिताः अरब राष्ट्रनाप शान्ति सम्झौता मयाकूगु जूसा इजरायल व अरब दथुइ युद्ध जुयां तुं च्वनीगु खइ। इजरायल थ्व अर्थय् ढुक्क जूगु खः कि छखे अरबया छुं प्रतिशत भूभाग थःगु ल्हातय् लाकेत ताःलातसा मेखे उग्रपन्थी प्यालेष्टिनी संगठन हमासया शक्ति क्वपालेत नं ताःलात छाय्धाःसां न्हापा जोर्डन व इजिप्टं साथ बियाच्वंगु इलय् उगु संगठनया शक्ति अप्वयाच्वंगु खः। उगु सम्झौता लिपा सिरिया बाहेक मेगु देशं नं हमासयात यानाच्वंगु ग्वाहालि त्वःता हल ।

सन् २००० लिपा कट्टरपन्थी मुश्लिमतय्सं नं राजनीतिक लाइन हिलाः नरम नीति ज्वन। प्यालेष्टिनीतय्सं बम व बन्दुकया राजनीति त्वःताः मुश्लिम सिद्धान्त ज्वनाः राजनीति यात। प्यालेष्टिनी राज्यय् जूगु चुनावय् हमास सत्ताय् वनेत ताःलात। राष्ट्रपति महमुद अब्बासं विश्वयात इनाप यात कि थःपिंत संयुक्त राष्ट्र संघया सदस्यता बीकेत ग्वाहालि यायेमाल। विश्वया आपालं देश प्यालेष्टाइनया पक्षय् खःसां अमेरिकां भिटो प्रयोग यानाः फासांफुसुं याना बिल। अमेरिकां इजरायलयात थुभनं साथ बियाच्वंगुया छगू कारण अमेरिकाया राजनीतिइ यहुदीतय्गु पकड दुगुलिं खःसा मेगु कारण मुश्लिम शक्तियात नष्ट यायेत नं खः ।

More Stories Like this