शान्ति सम्झौताय् लडाकु विभाजित
येँ(सन्ध्या टाइम्स)/राजनीतिक दलतय् दथुइ जूगु ७ बुँदाया सहमति प्रति असन्तुष्ट लडाकुतय्सं थौं सुथय् पत्रकार सम्मेलन यानाः विरोध प्वंकूगु दु।
सुर्खेतया दशरथपुय् च्वंगु छटौं डिभिजनया लडाकुतय्सं पत्रकार सम्मेलन यासें यदि सम्झौता भिंकेगु ज्या मयात धाःसा नेतात थम्हं म्हूगु गालय् थः हे कुहां वने माली धकाः ख्याच्वः बिउगु दु। सहमतियात लडाकुतय्सं समर्थन यात धकाः एकपक्षीय समाचार वयाच्वंगु खँय् आपत्ति प्वंकुसें छैटौं डिभिजनया सहायक कमाण्डर दुर्गाप्रसाद चौधरीं सम्झौतां माओवादी लडाकुयात विघटन याइगु दावी यानादिल। वय्कलं धयादिल 'जनमुक्ति सेनाया विघटन हे दकलय् तःधंगु सजाय व अपमान खः। आः थ्व बिसें तःधंगु कारवाही छु जुइ? ७ बुँदाया सहमति सेना समायोजन मखुसे न्हूगु भर्ना प्रक्रिया खः।'
वय्कलं उगु सहमति नेपाः व सेनाया हित चाहे मजूपिं अदृश्य शक्तिं तयार याःगु ड्राफ्ट खः धकाः नं धयादिल।
