सेनाया टेण्डर लाकेत नं गुण्डा प्रयोग

येँ (सन्ध्या टाइम्स)/थौं खुले जुइगु नेपाली सेनाया रासन टेण्डर विवादं यानाः रुकुमया सदरमुकाम मुसिकोट तनावग्रस्त जूगु दु। सेनाया उगु टेण्डर ल्हातय् लाकेगु लागिं सक्रिय जुयाच्वंगु पुचःतय् दथुइ ल्वापु जुयाः वंगु निन्हु न्ह्यवंनिसें उगु लागाय् तनाव जुयाच्वंगु खः।
राशन ठेक्का ल्हातय् लाकीपिंसं छ्यलातःपिं स्थानीय गुण्डातय्सं ल्वापु तच्वयेकी धकाः निन्हु न्ह्यवंनिसें अन प्रहरी नं आपालं परिचालन यानातःगु दु। गुण्डातय्सं टेण्डर तयेत वनेमाःगु सेनाया दि फेमस महिन्द्रा दल गण वनेगु लँपु हे पनातःगुलिं अन तनाव जूगु खः।
नेपाली सेनाया नितिं ५ करोड ८२ लाख ३१,५०० तकाया राशन न्यायेत टेण्डर आह्वान यानातःगु खः। गोप्य बोलपत्रय् दकलय् म्हो भाः तइम्ह ठेकेदारयात टेण्डर बी। थौं सनिलय् उगु टेण्डर खोले यायेगु मिति बियातःगु खः। म्हिगः बहनी तक स्वंगू कम्पनीं टेण्डर दर्ता यायेधुंकूगु दु। दर्ताया म्याद थौं नं दनिगु जुयाः न्हापा दर्ता यायेधुंकूगु कम्पनीया गुण्डातय्सं मेपिंत फाराम तकं दर्ता याके मबीकेगु निंतिं सेनाया व्यारेक वनेगु लँ तकं बन्द याना बिउगु खः।
टेण्डरया फाराम दर्ता याः वनीपिंत लँय् हे पनाः ख्यायेगु, उमिगु फाराम खुना बीगु थेंज्याःगु ज्या समेत जुइगु सम्भावना खनाः टेण्डर तः वनीपिं ठेकेदारतय्त प्रहरी भ्यानय् स्कर्टिङ्ग यानाः सेनाया ब्यारेक दुने तक तया बीगु व्यवस्था याःगु दु।
ठेकेदारतय्सं सुरक्षाया माग यानाः सीडीओलय् निवेदन तःगुलिं अथे स्कर्टिङया ब्यवस्था यानागु खँ रुकुमया प्रहरी निरीक्षक किशोर श्रेष्ठं कनादीगु दु।