शान्ति सम्झौताय् भारतीय भूमिका

...जब खनाल चकित जुल

येँ (सन्ध्या टाइम्स)/स्वंगू तःधंगु दल व मधेसी मोर्चा दथुइ नकतिनि जूगु शान्ति सम्झौता भारतया पहलय् जूगु खः धकाः माओवादीया हे असन्तुष्ट नेतातय्सं द्वपं ला बी हे धुंकल तर थ्व सम्पूर्ण प्रक्रियाय् भारतपाखें याःगु छगू घटनां एमालेया अध्यक्ष झलनाथ खनालयात धाःसा गाक्कं हे चकित याना बिउगु जुयाच्वन ।

प्यंगू दल दथुइ वंगु कार्तिक १५ गते बहनी उगु शान्ति सम्झौता जूगु खः। कार्तिक १४ गते सुथय् फुक्कं दलया शीर्ष नेतातय्सं सहमति कायम याःगु खःसां माओवादीया मोहव वैद्य पक्षं असन्तुष्टि प्वंकूगुलिं सम्झौता जुइ मफुगु खः। वहे १४ गते बहनी एमाले अध्यक्ष झलनाथ खनालयात भारतपाखें छगू फोन वःगु जुयाच्वन। फोन याःम्ह मनुखं खनालयात थौं छक्वः तुरुन्त हे नापलाये माल धकाः आग्रह यात। खनालं थौं बहनी जुइधुंकल, कन्हय् नापलाये धाल। तर फोन याःम्ह मनुखं तसकं जरूरी जूगुलिं थौं हे नापलाये धाल। खनालं अय्सा छेँय् वा धया छ्वत। धयाखतं उम्ह मनू खनालया छेँय् थ्यंकः वल। वं थःत भारतीय गुप्तचर संस्था 'र' या 'थर्ड म्यान' पोजिसनय् दुम्ह धकाः परिचय बिउगु जुयाच्वन। खँल्हाबल्हाया झ्वलय् उम्ह मनुखं शान्ति प्रक्रियाय् एमाले सकारात्मक जुइ माल धकाः इनाप यात ।

खनालं शान्ति प्रक्रियाय् एमाले न्ह्याबलें हे सकारात्मक दु धकाः लिसः बियाछ्वत। उगु इलय् वय्कःयात नापलाः वःम्ह मनुखं थम्हं माओवादी, कांग्रेस व मधेसी नेतातलिसे नं खँ ल्हायेधुनागु व उपिं सकलें सकारात्मक दुगुलिं एमाले नं सकारात्मक जुइ माल धयागु खः धकाः स्पष्ट यात।
देशय् जुइत्यंगु शान्ति प्रक्रिया बारे 'र' या मनूत थुभनं सक्रिय जुया वःगु खँयात कयाः खनालं कन्हय् कुन्हु वालुवाटारय् माओवादी नेतातय् दथुइ प्रशंग न्ह्यथनादिल ।

माओवादी अध्यक्ष प्रचण्ड, प्रधानमन्त्री बाबुराम भट्टराई, नेतात मोहन वैद्य व राम बहादुर थापा बादल व एमालेपाखें खनाल लगायत अशोक राई व सुरेन्द्र पाण्डे समेत दुगु उगु थासय् खनालं छन्हु न्ह्यः भारतीय एजेण्टलिसे थम्हं यानागु सम्पूर्ण खँ कना बिल। वहे दिनय् बहनी लिबाक्क न्हय्गू बुँदाया सम्झौताय् हस्ताक्षर जुल। हस्ताक्षरया ज्या सिधयेकाः खनाल छेँय् थ्यंबलय् बहनी १० बजे ती जुल जुइ। वय्कःयात हानं वहे भारतीय एजेण्टया फोन वल। वं खनालयात फोनय् धया हल, 'छिं ला झी दथुइ जूगु फुक्क हे खँ पिने कनादिल खनिं। थ्व ला बांलाः मजुल नि !'

वयागु खँ न्यनाः खनाल ज्यः जुल। मुक्कं न्हय्म्ह मनूया दथुइ ल्हानागु खँ न्हिछिया दुने हे भारतयात कना तयेधुंकूगु खनाः खनाल चकित जूगु खँ सूत्रं धाःगु दु ।

थौं जुइ माओवादी दुने मारामार
नकतिनि जूगु शान्ति सम्झौता लगायत थीथी विषययात कयाः माओवादी केन्द्रीय कमिटीया बैठक थौं न्हिनय् १ बजे च्वनेत्यंगु दु। बैठक न्ह्यः निगुलिं पक्षं तयारी याःगुलिं बैठकय् मारामार जुइफुगु अनुमान जुयाच्वंगु दु ।