लँय् पलाख्वाँय्

माधब मूल

थन थ्यंकाः
अजूचाया वइ
छु जुया थन वयेमाःगु ज्वी
मनय् खँ वात्तुवाली
सखे, बाँलागु लकसय् हे
जिं पलाः तये खन
गुलि लय्ताल ज्वी अबले
जिमि माँ, जिमि बौ
जिं थनं यात्रा न्ह्याकेवं ।

थनं न्ह्यागु जि
उकिया बाखनय्
थःत पात्र यानाः
गुलि ला म्हिते धुन ?
म्हिता म्हिता हे
मचाया ई नं फुइ धुंकल ।

स्याःचा नापं लय्ता दक्वं मुंकाः
सफू हे मजुइगु नं छुं मदु
जिया बाखँ
सखे, छन्हु तापाक्कया यात्राय्
थःत थमन्तु मथ्यंकुसे गाइ मखु

थ्व हे हुनिं
जिं न्ह्याकागु पलाख्वाँलय्
लिफः स्वया च्वना ।

वाल्ल जि जिया बाखँसिवें
मेगु छुं मरु थन ।

More Stories Like this