आः राष्ट्रिय सरकारय् दावी

येँ (सन्ध्या टाइम्स)/स्वंगू तःधंगु दल व मधेसी मोर्चा दथुइ म्हिगः जूगु न्हय्गू बुँदाया सहमति लिपा प्रधानमन्त्री डा. बाबुराम भट्टराईया नेतृत्वय् दुगु वर्तमान सरकारया भविष्य अनिश्चित जूगु दु। म्हिगः जूगु न्हय्गू बुँदाया सम्झौताया अन्तिम बुँदाय् शान्ति व संविधान च्वयेगु ज्या न्ह्याः वनेवं राष्ट्रिय सरकार गठनपाखे नं न्ह्याः वनेगु खँ उल्लेख यानातःगु दु। उकिया अर्थ वर्तमान सरकार भंग यानाः न्हूगु हे सहमतिया सरकार गठन यायेगु धाःगु खः। तर उगु सरकारया नेतृत्व सुनां याइ धइगु खँ धाःसा आः तक निश्चित जूगु मदुनि ।

सूत्रतय्सं धाः कथं आः गठन जुइगु अज्याःगु सरकारया नेतृत्व नेपाली कांग्रेसं याये दयेमाः धकाः दावी याना हये धुंकूगु दुसा तःधंगु दलया हैसियतं माओवादीं नं अज्याःगु हे दावी यानाच्वंगु दु। माओवादीपाखें धाःसा अध्यक्ष प्रचण्डया हे नेतृत्वय् सरकार गठन यायेगु खँ वयाच्वंगु दु। प्रधानमन्त्री डा. बाबुराम भट्टराईनं धाःसा वंगु ताः ई न्ह्यवंनिसें थःगु हे नेतृत्वय् राष्ट्रिय सरकार गठन जुइ धकाः दावी याना वयाच्वंगु दु। राष्ट्रिय सरकार गठनय् एमालेपाखें धाःसा छुं दावी याःगु मदुनि ।

वैद्य पक्षं सम्झौता च्याकीगु
प्रमुख स्वंगु दल व मधेसी मोर्चाया शीर्ष नेतातय्सं म्हिगः हस्ताक्षर याःगु न्हय्गू बँदाया सम्झौतायात माओवादी उपाध्यक्ष मोहन वैद्य पुचलं सार्वजनिक रुपं च्याकीगु जूगु दु। म्हिगः प्रधानमन्त्री निवास वालुवाटारय् उगु सम्झौताय् हस्ताक्षर जूगु इलय् हे उपाध्यक्ष मोहन वैद्यं विरोध यानाः पिहां वःगु खः ।

सम्झौतायात कयाः विरोध यासें वैद्य पक्षं थौं राष्ट्रिय सभागृहय् छगू पत्रकार सम्मेलन यासें उगु सम्झौता विरुद्ध थःपिंसं संघर्ष हे न्ह्याकेगु धकाः घोषणा याःगु खः।
थःगु पक्षया आपालं कार्यकर्तातय् दथुइ याःगु उगु पत्रकार सम्मेलनय् न्ववासें पार्टीया महासचिव रामबहादुर थापा (बादलं) म्हिगः जूगु सम्झौता जनमुक्ति सेनाया योद्धातय् लागिं हाकुगु चा साबित जूगु दु धयादिल। वय्कलं थौंया न्हि थःपिंसं न्हूगु कथं संघर्ष यायेगु घोषणा यानागु जूगुलिं थ्व न्हि नं ऐतिहासिक क्षण खः धयादिल। वय्कलं धयादिल, 'नेपाली कम्युनिष्ट आन्दोलनया इतिहासय् कार्तिक १५ गतेया चा छगू हाकुगु चाया रुपय् इंगित जुइ ।'

उगु हे ज्याझ्वलय् न्ववासें उपाध्यक्ष मोहन वैद्यं सम्झौतापाखें जनमुक्ति सेनां याःगु योगदानया अवमूल्यन याःगु दु धासें उकियात थःपिंसं स्वीकार याये मफइगु खँ धयादीगु खः। वय्कलं म्हिगः जूगु सम्झौताय् उल्लेख जुयाच्वंगु थीथी बुँदायात बुँदागत रुपं हे आलोचना यासें उकियात स्वीकार याये मफइगु खँ कनादीगु खः ।