राजनीतिक गतिरोध क्वचाल
येँ(सन्ध्या टाइम्स) प्रधानमन्त्री डा. बाबु राम भट्टराईनं म्हिगः प्यंगू दल दथुइ जूगु न्हय्गू बुँदाया सहमतिपाखें थःपिनि दथुइ कायम जुयाच्वंगु गतिरोध अन्त्य जूगु खँ कनादीगु दु। थौं छठ पर्वया लसताय् थनया रानी पुखुली जूगु छगू समारोहय् न्ववासें वय्कलं थज्याःगु ऐतिहासिक सम्झौताया छठ कुन्हु हे लाःगुलिं छठया लसताय् थ्व ति तःधंगु भिंतुना मेगु मजुइगु खँ नं कनादिल ।
वंगु न्यादँ न्ह्यः सुरु जूगु शान्ति प्रक्रियायात निष्कर्षय् थ्यंकेगु ज्या म्हिगःया सहमतिपाखें जूगु खः धासें वय्कलं धयादिल, 'थुगुसीया छठ पर्व नेपाःया लागिं ऐतिहासिक न्हि जूगु दु। गतिरोध अन्त्य जूगु कारणं आः संविधान च्वयेगु ज्यायात नं याउँक न्ह्यःने यंके फइगु आशा प्वंकादिल। वय्कलं सहमतियात आः कार्यान्वयनय् यंकेगु तःधंगु भाला दुगु खँ नं न्ह्यथनादिल ।
