ब्रिटिश म्यूजिमय् बुद्ध भारतय् जन्म जूगु सन्देश

येँ (सन्ध्या टाइम्स)/ब्रिटिश म्यूजियमया 'द डिपार्टमेन्ट अफ एसिया' कक्ष अन्तर्गत 'द लाइफ अफ द बुद्ध' शीर्षकय् ब्वयातःगु दस्तावेजय् बौद्ध धर्मयात भारतीय धर्म अन्तर्गत तयाः 'बुद्ध खुगूगु शताब्दीया मध्यपाखे उत्तर पूर्वी भारतया छगू शाही परिवारय् जन्म जूगु खः' धकाः न्ह्यथनातःगु दु ।

दँय् अथे हे ६० लाख पर्यटकतय्सं अवलोकन याइगु उगु म्यूजियमय् बुद्धया जन्म महारानी मायादेवीपाखें लुम्बिनीया मृगस्थलय अजूचायापुक जूगु खँ न्ह्यथनातःगु दु। ई. सं. १७५३ पाखे उगु संग्रहालय पलिस्था याःगु खः।बुद्धिष्ट कम्युनिटी सेन्टर यूकेया उपाध्यक्ष नारायणप्रसाद गुरुङं उगु दस्तावेज बारे थम्हं मसिउगु नापं वइगु नोभेम्बर १२ य् जुइगु संस्थाया ट्रष्टी बैठकय् थ्व खँ ल्ह्वनेगु जुइ धयादिल। भारतं सन् २०१२ दुने नेपाःया कपिलवस्तुनाप स्वाःगु सीमावर्ती राज्य उत्तर प्रदेशया अलिगढवाय् नकली देवदह व लुम्बिनी दयेके सिधयेकेगु ताः तयाः ज्या यानाच्वंगु खँ न्ह्यथँसें उकिया विरुद्ध सः थ्वयेकेत दयेकूगु कपिलवस्तु दिवस अभियानया विश्व संयोजक ई. रामकुमार श्रेष्ठं ब्रिटिश म्यूजियमं गल्ती भंकेगु ज्या याकेत नेपाल सरकारं हे कुतः यायेमाःगु खँ कनादिल। सर्च इन्जिन गुगलं नं थ्व सिबें न्ह्यः गौतम बुद्ध भारतय् जन्म जूगु धकाः प्रचार यानाच्वंगुयात भिंके धुंकूगु खँ लुमंकुसें श्रेष्ठं धयादिल, 'कुटनीतिक तहलं नेपाल सरकारं समस्या समाधान यायेमाः ।'

संयुक्त राष्ट्र संघया युनेस्कोपाखें सन् १९९७ स बुद्धया जन्मस्थल लुम्बिनीयात विश्व सम्पदाया धलखय् तयेधुंकूगु जूसां नं बुद्धया जन्मभूमि बारे भ्रम ब्वलंकेगु ज्या धाःसा निरन्तर रुपं जुया हे च्वंगु दु ।