गणतन्त्र पलिस्थाया दच्छि

नेपालय् गणतन्त्र पलिस्था जूगु थनिं दच्छि क्यन । जनताया निरन्तर संघर्ष व बलिदान लिपाः २०६५ जेठ १५ गते संविधानसभाया न्हापांगु बैठकं देशय् गणतन्त्र कार्यान्वयन यायेगु निर्णय याःगु खः । २०६४ चैत २८ गते क्वचाःगु संविधानसभाया निर्वाचन लिपा दच्छि न्ह्यः च्वंगु बैठकं अत्याधिक बहुमत सहित गणतन्त्रया घोषण याःगु खः । संविधानसभाय् उपस्थित निसः व खुइप्यम्ह दुजःत मध्ये निसः व खुइम्ह दुजःतय् अत्याधिक बहुमतया साथ गणतन्त्रया घोषण जूगु खः ।

गणतन्त्र पलिस्था लिपा देशय् साउन ६ गते न्हापांगु खुशी राष्ट्रपतिया निर्वाचन मार्फत डा. रामवरण यादवयात देया न्हापांम्ह राष्ट्रपति ल्ययेगु ज्या जुल । अथेहे गणतन्त्र नेपालया न्हापांगु सरकार साउन ३१गते गठन जुल । न्हापांगु सरकारया नेतृत्व यायेगु ह्वता चूलात संविधानसभाय् दकलय् तःधंगु दल जुया वःगु माओवादीया अध्यक्ष पुष्पकमल दाहाल 'प्रचण्ड'यात ।

तर, गणतन्त्र स्थापना जुइधुंकाः नं गणतन्त्र नेपाःया न्हापांगु सरकार गुलाःया दुने हे पद मुक्त जुइ माल । प्रधानसेनापति रुक्मांग कटवालयात पदमुक्त यायेगु सरकारया निर्णय राष्ट्रपति डा. रामवरण यादवं अस्वीकार यानाः प्रधानसेनापति यात पदय् च्वनाच्वनेत ब्यूगु निर्देशनं द्वैध सत्ता स्थापना जूगिलं नागरिक सर्वोच्चताया निंति धासें माओवादी सरकारं राजीनामाया घोषणा याःगु खः ।

माओवादी सरकार लिपाः आः एमालेया वरिष्ठ नेता माधवकुमार नेपालया नेतृतवय् सरकार गठन जूगु दु । तर थ्व सरकारयात संविधानसभाय् दकलेये तःधंगु दल माओवादीया समर्थन मदुगुलिं सरकार संचालन यायेत थाकूइगु खनेदु । नापं सरकारय् ब्वलय् शान्ति प्रकृया व संविधान निर्माण यायेगु ज्याया यात तार्किक निष्कर्ष थ्यंकेगु व देशय् स्यंनावनाच्वंगु शान्ति सुरक्षायात बल्लाकेगु प्रमुख हाथ्याया कथं खनेदुगु दु ।

संविधान निर्माण यायेगु ज्या दच्छिया दुने खासय् छुं उपलब्धि जुइफुगु मदुनि । संविधान निमार्णया कार्यतालिका प्यक्व तकः हिले धुंकूगु दु । उकीं संविधान निर्माण ज्या ईलय् हे सिधइगु खः वा मखु धइगु खँय् जनता अन्यौल जुयाच्वंगु खनेदु ।

गणतन्त्र पलिस्था जूगु दच्छि दुने जनतां चहानाया कथं संविधान निमार्ण यायेगु ज्याय् सन्तोषजनक मजूगुलिं दक्वं राजनीतिक दलतय्सं जनताया भवना थुइकाः सहमति व सहकार्यया राजनीति यानाः ईलय् संविधान निर्माण यायेगु व शान्ति प्रकृयायात तार्किक निष्कर्षय् थ्यंकाः गणतन्त्रयात संस्थागत यायेगु ज्याय् पूर्ण दृढताया साथ न्हाया: वनेमाःगु थौंया प्रमुख आवश्यकता जूगु दु ।

More Stories Like this