पुलांम्ह भाःतं जग्गा नया बिउगु द्वपं

यल/थनया पाटन औद्योगिक क्षेत्र निवासी उद्यमी मेनका श्रेष्ठं थःगु नामय् लानाच्वंगु जग्गा थः हे पुलांम्ह भाःतं नकली मोही व भ्वं दयेकाः हडपे याःगु द्वपं बियादीगु दु। म्हिगः थन छगू पत्रकार सम्मेलन यासें वय्कलं वंगु २०५१ भदौ २२ गते थः मां हीराकुमारी श्रेष्ठं थःत बकसपत्र यानाः पास याना बिउगु कित्ता नम्बर १०३ या १ रोपनी ८ आना १ पैसा दुगु जग्गा आः थःहे पुलांम्ह भाःत राजेन्द्र देव श्रेष्ठया योजनाय् रामवीर श्रेष्ठ, रामदेवी श्रेष्ठ व बिजुलीमैंयाँ श्रेष्ठ मिले जुयाः नक्कली मोही व किर्ते नागरिकता दयेकाः हड्पे याःगु द्वपं बियादीगु खः। जग्गाया किर्ते मोहीया रुपय् भाइलाल महर्जनयात न्ह्यःने थने हःगु व वं थीथी मनूतय् किपा तिकातःगु किर्ते नागरिकता प्रयोग याःगु दावी नं मय्जु श्रेष्ठं यानादीगु दु। थुकी यल उपमनपाया कर्मचारीतय् नं ल्हाः दुगु वय्कःया द्वपं दु। थुकिया बारे सर्वोच्च अदालतं २०५७ सालया पुस २५ गते थःगु पक्षय् फैसला न्यंकेधुंकूगु खःसां भूमि सुधार कार्यालय, प्रहरी व जिप्रकां उकिया कार्यान्वयन मयाःगु खँ नं वय्कलं कनादिल । (रासस)