हानं मतया भाः थकायेगु प्रस्ताव

नेपाल विद्युत प्राधिकरणं मतया भाः थकायेगु लागिं तयारी सुरु याःगु दु। भाः थकायेगु लागिं न्हूगु भाः समेत तयाः प्राधिकरणं विद्युत महसुल निर्धारण समितियात सिफारिस यायेधुंकूगु दुसा आः छुं ई लिपा हे समितिं भाः थकायेगु सिफारिसयात सदर याना छ्वइगु सम्भावना दु। यदि प्राधिकरणया सिफारिसयात गथे खः अथे हे पारित याना बिल धाःसा देशय् छक्वलं हे ४४ प्रतिशत तक मतया भाः थहां वइगु सम्भावना दु। थौंकन्हय् चिकुलाया ई। नेपालय् मत अप्वः खपट जुइगु मौसम खः थ्व। मत मदयेकं मगाइगु थ्वहे मौसमय् लाकाः मूल्य निर्धारण समितिं भाः थकायेगु अनुमति बीगु सम्भावना दु। अनुमति वयेवं हे प्राधिकरणं मतया भाः थकया हे छ्वइ। नेपालय् दुगु उर्जा मध्ये विद्युत हे छगू जक अज्याःगु उर्जा खः गुगु छ्यलेबलय् विदेशय् दां छ्याच्वनेम्वाः। थ्व थःगु हे देसय् उत्पादन जूगु उर्जा खः। वास्तवय् सरकारं नेपालय् प्रवर्धन यायेमाःगु उर्जा धइगु विद्युत हे खः। अले नेपालय् आपालं सम्भावना दुगु उर्जा नं थ्वहे खः। तर लगानी, व्यवस्थापन व राज्यया अकर्मण्यताया कारणं नेपालं माक्व विद्युत पिकाये फयाच्वंगु मदु। छगू ला देशय् गुलि माग दुगु खः उलि हे उत्पादन याये मफु। थुकिं यानाः दुगु उत्पादनया हे भाः थकयाः व्यवस्थापन खर्च पिकायेत विद्युत प्राधिकरण बाध्य जुयाच्वंगु दु। नेपालय् वइपिं सरकारतय्सं हरेक चिकुलाय् लोड शेडिंगया ई बढे याये त्ययेकाः आः उर्जा क्रान्ति यायेगु धकाः न्ववायेगु बाहेक मेबलय् गबलें हे ध्यान बियाच्वंगु खने मदु। विद्युतया थप उत्पादन हे थुकिया भाः क्वपालेगु मू लँपु खः ।

More Stories Like this