आत्मा मखु आत्म दु

लाभरत्न तुलाधर

बौद्ध समाजया दुने ब्वलनाच्वंगु ज्वाँय्ज्वाँय् विकृतियात म्हसीकाः समाजया न्हाय् थुज्याःपिं सः सिउपिंसं हे सुधारया निंतिं चिउताः कायेमाल धकाः बारम्बार पौ च्वयाः चिन्ता पिब्वयाच्वनीपिं मध्येय् छम्ह यलया जगतमान शाक्यजु नं खः। थुपालय् वय्कलं मेगु हे विषयय् थःत जुयाच्वंगु निब्वस्वब्व (दुविधा) वा भ्रान्ति न्ह्यब्वयादिल। न्हापा न्हापाया गुलिखे वय्कःया न्ह्यसःया लिसः आःतक नं निरुत्तरित हे तिनि। उकिं थुगु पती भ्रान्तिया बारे नं विद्वान धायेका च्वंपिंसं गुगुं निवारण याइ धकाः भलसा याये मछिं। थुकिया निम्तिं थम्हं सिउगु वा थूगु वय्कःया न्ह्यसः, जिज्ञासा वा भ्रमया निराकरण निम्तिं कुतः याये।
शाक्यजुया शंका वा न्ह्यसः खः कि 'आत्मा' धाःगु वस्तु दु ला कि मदु? अले थम्हं ब्वना, न्यनातयागु लिधंसाय् थम्हं तुं लिसः लुइका थें च्वयादी कि आत्मा धइगु द हे दु वा दये हे माः। तर थौं म्हिगः बौद्ध विद्वानपिंसं आत्मा मदु धकाः च्वयेगु वा धायेगु यानाच्वंगुलिं अनया विचाःलिसे मेल मनःगुलिं चित्त बुझे धाःसा मजूगु जुयाच्वन। बुद्ध वचनया सत्यताय् तकं शंकाया दृष्टिं स्वयादिल ।

जगतमानजु, छिं बौद्ध शास्त्रलिसे भचा भचा हिन्दू शास्त्र नं ब्वनातःगु खनेदु। उकिं जकं थथे विचाः स्वत्तुमतु स्वयेकाच्वने माःगु ला धइथें नं च्वं। वास्तवय् थुइक, पूवंक अध्ययन यायेगु खःसा झीसं न्ह्यागु धर्मया सफू नं स्वयेबहः जू। अले जक मखा शास्तां सल्लाह बिउ थें वहश्रुत व भन्तेपिंथें एकपक्षीय अध्ययन धइगु छपा मिखां जक स्वये थें जुइ ।

हिन्दू धर्मकथं आत्मा धइगु अजर, अमर, ध्रव, शाश्वत जक मखु परमात्मा (ईश्वर) या हे छकूचा अंश खः। उकिं थ्वयात लः, मि, फय्, शस्त्र-अस्त्र वा गुगुं नं भौतिक पदार्थं नष्ट याये फइ मखु। बरु गथे वसः भ्वाथः जुयाः जीर्ण शीर्ण जुल कि मनूतय्सं न्हूगु वसः हिलीगु खः, अथे हे शरीर रुपी वस्त्र जरा व व्याधिया कारणं मृत जुल कि न्हूगु शरीर धारण यानाः मेगु हे जन्म काइ ।

मेगु भ्रम खः, आत्म व आत्माया भेद मथूगु। पञ्चबुद्धात्मने नमः धाःगु पञ्चतत्वं निर्माण जुयाच्वंगु थःगु शरीरयात प्रणाम ! झीसं न्हूदँबलय् यायेगु म्हपुजायात आत्मपुजा नं धाइ। छाय्धाःसा आत्म = थः, आफू (self) थः अले आत्मा = soul थ्व फरक मथूपिंसं गुगुं पात्रोय् म्हपुजा व ब्राकेट दुने (आत्मापुजा) च्वयातःगु नं खनेदु। थुकिया लिधंसा कयाः झी नेवाःतय्सं न्हूदँ कुन्हु आत्मायात पुजा याइगु धकाः भाःपीगु वा कना जुइगु ज्या पाय्छि जुइ ला? छक्वः लिसा कयाः विचाः याये माली ।

More Stories Like this