भ्याट छले याःपिंत तुरुन्त हे कारवाही या

सरकारयात पुलेमाःगु भ्याट कर छले याःपिनि नां सार्वजनिक जुइवं देय्या आर्थिक ख्यलय् तःधंगु ग्वःफय् वःगु दु। थुकी भ्रष्टाचारया कारणं न्हापा लिपा नां पिहां वइपिं मनूत जक मखु देय्या नेतातय्त अथे मयाः थथे मयाः धकाः शिक्षा बिया जुइपिं धुरन्धर व्यापारीतय् नं दुथ्यानाच्वंगु दु। गोल्छा, चौधरी थेंज्याःपिं देय्या सर्वोच्च संसदया दुजः जुयाच्वंपिं सभासद्तय् व्यापारिक पुचलं तकं भ्याट छले यानाः देय्या नोक्सानी यानाच्वंगु खँ नं थुकिं सीदुगु दु। छगू कथं धायेगु खःसा कर छले यानाः राष्ट्रयात हानी मयानाच्वंगु संस्था हे मदु ला धइथें ज्याःगु किपा थ्व नां सार्वजनिक जुइवं खने दया वःगु दु। थ्व नेपाःया आर्थिक व वाणिज्य व्यापारया लागिं तःधंगु हे दुःखया खँ खः ।

खतुं भ्याट छले याःपिंत कारवाही यायेमाः धकाः न्हापा नं सः पिहां वयाच्वंगु हे खः। तर तत्कालिन अर्थमन्त्रीं थ्व ज्या मयाः। कारवाहीया ला खँ हे त्वःते, भ्याट छले याःपिं धकाः छानबिन जुयाच्वंपिं व्यापारिक संस्थाया नां तकं पित मबिउ। अन्ततः देशय् लागू जुइधुंकूगु सूचनाया हक सम्बन्धी कानूनया बः कयाः अदालतया आदेश वयेकाः तिनि थ्व नां सार्वजनिक जुल। नां सार्वजनिक जुइधुंकाः नं कारवाही यायेगु धकाः आश्वासन तिनि वल, पलाः अझ नं न्ह्याकूगु मदुनि। नां सार्वजनिक जुइधुंकाः नां दुथ्याःपिं व्यापारीत फरार जुइगु सम्भावना दु। उकिं उमित तुरुन्त हे कारवाही याना छ्वयेमाःगु खः। वास्तवय् थ्व सरकारं भ्रष्टाचार निर्मूल याये धकाः बचं बिउ थें धाथें ज्या याइगु खः लाकि मखु धकाः परीक्षा यायेगु दकलय् मुख्य ई नं थ्वहे खः ।

More Stories Like this