मतया भाः थकायेत प्रस्ताव अध्ययनया निंतिं उपसमिति गठन

येँ(सन्ध्या टाइम्स)/मतया भाः क्वःछीगु सरकारी निकाय विद्युत महसुल निर्धारण आयोगं मतया भाः थकायेगु सम्बन्धी प्रस्तावया अध्ययन यायेत छगू उपसमिति गठन याःगु दु। नेपाल विद्युत प्राधिकरणं मतया भाः थकायेमाःगु धासे न्ह्यब्वःगु प्रस्ताव अध्ययन यानाः बाःछिया दुने सुझाव बीत उगु उपसमिति गठन याःगु खः।
प्राधिकरणं न्ह्यब्वःगु प्रस्ताव अध्ययन यानाः सुझाव बीत आः नकतिनि च्वंगु छगू मुँज्यां आयोगया दुजः उत्तरकुमार श्रेष्ठया संयोजकत्वय् उगु उपसमिति गठन याःगु खः। उपसमितिं मतया भाः थकाये न्ह्यः उपभोक्ताया लिसें मेमेपिं सरोकारवालात नापं राय सल्लाह काइ।
थ्व स्वयां न्ह्यः विद्युत प्राधिकरणं स्वीगू प्रतिशतया ल्याखं मतया भाः थकायेत प्रस्ताव याये धुंकूगु दु। आयोगं आः गठन याःगु उपसमितिं मतया भाः थकायेत प्राधिकरणं याःगु प्रस्तावया अध्ययन यायेगु नापं थ्व स्वयां न्ह्यः तयार याःगु प्रतिवेदनया नं अध्ययन यानाः सिफारिश याइगु आयोगया अध्यक्ष गणेश सुब्बां कनादीगु दु। उपसमितिं प्रस्ताव अध्ययन यानाः सुझाव बीवं मतया भाः थकायेगु खँय् याकनं निर्णय जुइगु नं सुब्बां कनादीगु दु।
विद्युत प्राधिकरणं लिपांगु इलय् झिदँ न्ह्यव मतया भाः थकाःगु खःसा थौं तकं व हे भाः कायम यानातःगु दनि। उगु इलय् नं विद्युत चुहावट २४ प्रतिशत दुगु खःसा उकियात क्वपालाः १९ प्रतिशतय् थ्यंकेगु प्रतिवद्धता प्वंकूगु खः। तर उकिया पाय्छि अःखः विद्युत चुहावट अप्वया वनाः थौंया इलय् २८ प्रतिशत थ्यने धुंकूगु दु। अप्वया वनाच्वंगु विद्युत चुहावटं प्राधिकरणं दँय् न्हय्गू अर्ब स्वयां अप्वः द्यापं फयेमालाच्वंगु दु।
विद्युत प्राधिकरणं छुं ई न्ह्यः जक नं मतया भाः थकायेगु निंतिं प्रस्ताव याःगु खःसा उपभोक्तायात मार लाकेगु ज्या याये मजिउगु धासें आयोगया दुजःपिंसं भाः थकायेत अस्वीकार याःगु खः। उगु इलय् मतया भाः थकायेगु खँय् आयोग व प्राधिकरणया दथुइ जक कचवं ब्वलंगु मखसे स्वयं आयोगया दुजःपिनि दथुइ नं कचवं ब्वलंगु खः।
वंगु मोहनि न्ह्यः पुनर्गठित आयोगं निला लिपा मतया भाः थकायेगु धाःसा मोहनि धुंकाः धाःसा हाकनं प्राधिकरण दुने आन्तरिक सुधार यायेमाःगु धासें मतया भाः थकमकायेगु खँ धाःगु खः।