प्रतापपुर दयेकेत टेण्डर आह्वान
येँ(सन्ध्या टाइम्स)/मलखं कयाः ध्वस्त जूगु स्वयम्भु महाचैत्यया नापसं च्वंगु प्रतापपुर देगः पुनःनिर्माण यायेगु लागिं आः टेण्डर आह्वान याःगु दु। देगः दयेकीपिं सुं मवःगुलिं पुरातत्व विभागं वंगु निवाः न्ह्यः तिनि थ्व टेण्डर आह्वान याःगु खः।
देगः थुनाः अथें तया तःगु व दनेगु ज्या मजूगु खँय् स्वयम्भु महाचैत्य संरक्षण तथा व्यवस्थापन महासमितिं तःक्वःमछि दवाव बीगु ज्या यायेवं विभागपाखें अन्ततः देगः दने ज्याया लागिं टेण्डर आह्वान याःगु खः। टेण्डरपाखें ठेकेदार नियुक्त जुइवं हे उगु देगःयात आः जग थ्यंक हे पियाः पूवंक हे न्हूगु यानाः दयेकेगु खँ व्यवस्थापन समितिं धाःगु दु।
देगःयात पियाः दनेगु धकाः वयाच्वंम्ह ठेकेदार दथुइ हे बिसिउँ वंगु कारणं देगः अथें हे तुं अलपत्र अवस्थाय् लानाच्वंगु दु। देगःयात आः छतँजाः ति तयाः प्यखेरं खः ग्वया तःगु दु। गुंलाबलय् भक्तजनतय्त समस्या जुइ धकाः अन खः ग्वयेगु ज्या जूगु खः।
