जावलाख्यलय् प्रदर्शन यायेत्यंपिं स्वंगू दर्जन तिब्बती ज्वन
यल (सन्ध्या टाइम्स)/'फ्रि तिब्बत' या नारा थ्वयेकाः जावलाख्यलय् प्रदर्शन यायेत्यंपिं स्वंगू दर्जनं मल्याक तिब्बती शरणार्थीतय्त थौं प्रहरीं ज्वंगु दु।
प्रहरीं धाः कथं उमिसं तिब्बत स्वतन्त्रताया पक्षय् तिब्बतया थीथी लागाय् आत्मदाह याःपिं तिब्बती बौद्ध भिक्षुतय्गु लुमन्तिइ पुजा पाठ यानाः प्रदर्शन यायेत्यंगु खः।
प्रदर्शन यायेगु तयारी यानाच्वंपिं स्वंगू दर्जन तिब्बती शरणार्थीत ज्वंगु खःसां प्रहरीं उमिगु बारे मेगु थप विवरण धाःसा मबिउ। खुल्ला थासय् पुजा पाठ व प्रदर्शन यायेगु तयारी याःगुलिं हे उमित ज्वने माःगु खँ धाःगु दु।
थौं सुथय् ११ बजे प्रदर्शनया कुतः यानाच्वंगु इलय् हे प्रहरीं हस्तक्षेप यानाः उमित ज्वंगु खः। वंगु छुं न्ह्यः तिब्बतय् चिनीया शासनया विरोध यासें तिब्बती बौद्ध भिक्षुतय्सं आत्मदाह तकं याःगु खः।
