थौंया बैठक निर्णायक जुइगु
शान्ति, संविधान व सरकार छगू हे प्याकेजय्
येँ (सन्ध्या टाइम्स)/स्वंगू दलया शीर्ष नेतातय् दथुइ म्हिगः जूगु वार्ता लिपा आः देशय् शान्ति व संविधानया अवरुद्ध लुखा चायेकेगु खःसा सहमतीय सरकार हे गठन यायेमाः धइगु खँ सर्वसम्मत बिचाः ब्वलंगु खँ सूत्रं धाःगु दु। थुकिं यानाः शान्ति व संविधानयात न्ह्यःने यंकेगु ज्याया नापनापं वर्तमान सरकार भंग यानाः उकिया थासय् नेपाली कांग्रेस व एमाले समेत दुथ्याःगु सरकार गठन यायेगुपाखे नं पहल सुरु जूगु खँ धाःगु दु ।
आः सर्वदलीय सरकार गठन यायेगु खँ नं गाक्कं न्ह्यःने वनेधुंकूगु दुसा एमाले व कांग्रेसं शान्ति, संविधान निर्माणया ज्या व सरकार गठनया ज्यायात प्याकेजया रुपय् हे न्ह्यःने यंकेमाः धकाः प्रस्ताव तया हःगु दु ।
माओवादी उपाध्यक्ष मोहन वैद्य पुचलं शान्ति, संविधान व सेना समायोजनया ज्यायात प्याकेजया रुपय् न्ह्यःने यंकेमाः धकाः माग यानाच्वंगु दु। तर माओवादीया वैद्य पुचलं छगू प्रस्ताव व एमाले-कांग्रेसपाखें मेगु प्रस्ताव वयाच्वंगु खःसां आपालं खँय् सहमति धाःसा कायम जुइधुंकूगु दावी सूत्रं याःगु दु। माओवादीया अप्वः लडाकुयात समायोजन यायेगु व समायोजन मजूपिंत फयांफछि अप्वः ध्यबा बियाः पुनर्स्थापना यायेगु खँय् सहमति जुल धाःसा माओवादीया वैद्य पुचः माने जुइगु व उपिं माने जुइवं हे सहमतिया सरकार गठन यानाः शान्ति व संविधान निर्माणया ज्यायात न्ह्यःने न्ह्याका छ्वयेगु सहमति जूगु खँ सूत्रं धाःगु दु। थुकियात थौं च्वनीगु शीर्ष नेतातय् बैठकं क्वःछीगु खँ नं धाःगु दु ।
थ्व प्रचण्डया हे कासा जकं मखु ला?
स्वंगू दलया शीर्ष नेतातय् दथुइ म्हिगः जूगु बैठक माओवादी उपाध्यक्ष मोहन वैद्य पुचःया असन्तुष्टिं यानाः बिना निष्कर्ष क्वचायेकेमाःगु खः। तर बैठक बिना निष्कर्ष क्वचायेकेमाःगुया मू कारण मोहन वैद्य खःसां बैठकय् अज्याःगु स्थिति सिर्जना याःम्ह मू मनू धाःसा स्वयम् पार्टी अध्यक्ष प्रचण्ड खः लाकि धकाः थन आशंका प्वंकाहःगु दु। म्हिगःया बैठकय् उपस्थित जुइ माली धकाः उपाध्यक्ष वैद्य व सचिव सीपी गजुरेलयात सःतूम्ह अध्यक्ष प्रचण्ड हे खः। प्रचण्डं थःत लबः दइगु थासय् जुल धाःसा वैद्य पुचःयात खबर तकं मबिसे वार्ता यानाः खँ सिधयेका छ्वइगु। तर थःत चित्त बुझे मजूगु थासय् जुल धाःसा वैद्य पुचःयात न्ह्यःने तयाः खँ स्यंकेगु ज्या यानाच्वंगु जकं मखु ला धकाः विज्ञ सूत्रं आशंका प्वंका हःगु दु ।
