थौं सिथि नखः

नेवाःतय्सं तछलाथ्व षष्ठी कुन्हु तःजिक न्याकीगु छगू नखः खः सिथि नखः । तान्वःगु ई फुया वा वइगु ई जूगुलिं सिनाज्याय् लिमलाइ, बल्लाका च्वनेमाः धकाः थ्व नखः तःजिक न्यायेकी । थ्व चतांमह्रि, माय्वः, मूवः, कःसूवः जोरे यानाः पुजा यानाः नइगु नखः खः । थौं छेँ सुचुकुचु यानाः, म्वःल्हुया, ब्यंका बँथिलाः धर्ती पुजा याइ । थ्व नखःयात सुचुकुचु यायेगु नखः धकाः नं धायेगु याः । त्वाःवाः सकलें जानाः बहाः, ननी सुचुकेगु तुं इलेगु, बुंगाःचा इलेगु ज्या याइ । देपुजा मन्याःपिनि थुकुम्हु दिगुद्यः पुजा याःवनी ।

थौं हे महाद्यःया न्हापांम्ह काय कुमार कार्तिकेय बूगु नं दिं जूगुलिं थुकुन्हुयात कुमार षष्ठी धकाः नं धायेगु याः । पिखालखुइ पिनेसं छेँ रक्षा याइम्ह द्यःकथं कुमारयात पुजा यायेगु चलन दु । कुमारयात लःद्यः नं धायेगु चलन दु । अय्जूगुलिं तुं, बुंगाःचा सफा यानाः पुजा यात धाःसाः सफागु लः बुयावइ अले बुँया भरय् च्वनेमाःपिं नेपाःमिपिंत सिनाज्यायात जिइक वा नं वइ धाइगु धापू दु ।

More Stories Like this