विश्व नेवाः सम्मेलनया झ्वलय् नेपाःपाखें टेलिकन्फरेन्स

शनिवाःनिसें सुरु जूगु स्वन्हुन्यंकया विश्व नेवाः सम्मेलन सम्मेलनया झ्वलय् जूगु टेलिकन्फरेन्सय् नेपाःया यलस्थित सातोआकी स्मृति भवन कुपन्डोलय् नेपाःया नेवाः विद्वानतय्सं नं ब्वति काःगु दु।

टेलिकन्फरेन्सया ब्वति कयादीम्ह नेवाः देय् दबुया संरक्षक मल्ल के. सुन्दरं लन्डनय् जुयाच्वंगु न्हापांगु विश्व नेवाः सम्मेलनयात भिंतना बियादिसें विश्वया फुक्क नेवाःतय् सम्मेलन कथं थुइकाः थुकीया आवश्यकता, सङ्गठनया उद्देश्य व विषय स्पष्ट जुइमाःगु खँय् बः बियादिल ।

वय्कलं धयादिल, - नेपाः भूमिइ दुपिं नेवाःतय्सं ल्ह्वनाच्वंगु अधिकार सम्पन्न नेवाः स्वायत्त राज्यया मागयात विश्वन्यंक च्वंपिं नेवाःतय्सं ऐक्यवद्धता क्यनेमाः, नेवाः स्वायत्त राज्य प्राप्तिया निंतिं सम्मेलनं दबाब बिइमाः ।'

नेवाः देय् दबुया संरक्षक लक्ष्मण राजवंशीं नेवाः स्वायत्त राज्य स्थापनाया निंतिं थीथी क्षेत्रया प्रबुद्ध व्यक्तित्वनाप सहलह यायेत राष्ट्रियस्तरया छगू समिति आवश्यक दुगु खँय् बः बियादिल ।

नेपालभाषा मंका खलःया छ्याञ्जे नरेशवीर शाक्यं निक्वःगु विश्व सम्मेलन नेवाःतय् आदिम भूमि नेपालय् जुइमाःगु धयादिल । नेपाः राष्ट्रिय पार्टीया नायः डा. केशवमान शाक्यं नेवाःत आर्थिक, सांस्कृतिक, भाषिक व राजनीतिक रुपं लिउने लाःगु न्ह्यथनादिसें उकिया निंतिं फुक्कं नेवाःत जागृत जुइमाःगु खँय् बः बियादिल ।

हिरोसिमा विश्वविद्यालयया प्रा. केशव महर्जनं नेपालभाषा, नेवाःतय् पहिचान, हक अधिकार व कर्तव्यया निंतिं विश्वन्यंक च्वंपिं नेवाः समुदाय छप्पँ जुयाः नेवाःतय् उत्थानया निंतिं न्ह्याःवनेत आह्वान यानादिल ।

विश्व नेवाः सङ्घया न्वकु सुवन् बज्राचार्यं सम्मेलनय् नेपाःया संविधानय् नेवाः पहिचान सुनिश्चित जुइमाःगु व नेवाः स्वायत्त राज्यया आवश्यकताया बारेमा सहलह यायेत सुझाव बियादिल ।

न्हापांगु विश्व नेवाः सम्मेलनया शनिवाः नेपालभाषा एकेडेमिया चान्सलर सत्यमोहन जोशीं लन्डनय् उलेज्या यानादीगु खः । वर्ल्ड नेवाः अर्गनाइजेसन व पासा पुचः गुथि युकेया मंकाः ग्वसालय् जूगु उगु सम्मेलनया नारा 'लन्डन वनेनु, झिगु सः हलिमय् थ्वयेके नु' खः ।

नेवाः जाति, नेपालभाषा, नेवाः परम्पराया संरक्षण व संवद्धन नापं नेपाःया मेमेगू जातिया भाषा, धर्म, संस्कृतिया समान अधिकार स्थापित यायेगु निंतिं सः ल्ह्वनेत सम्मेलनया ग्वसाःग्वःगु खः । सम्मेलनय् नेपाः, जापान, अमेरिका, बेल्जियम, जर्मनी, स्पेनल गायतया १२ मुलुकया नेवाः जातिया ब्वति दुगु विश्व नेवाः सङ्घया न्वकु बज्राचार्यं जानकारी बियादिल । रासस

More Stories Like this