थौंया शीर्ष बैठक नं निष्कर्षहिन
माओवादीया आन्तरिक कचवनं यानाः निर्णय मजुल
येँ (सन्ध्या टाइम्स)/शान्ति प्रक्रियायात अन्तिम रुप बीगु लागिं थौं सुथय् च्वंगु स्वंगू दलया शीर्ष नेतातय् बैठक छुं हे निर्णय मयासे अथें क्वचाल। तर बैठकं छुं निर्णय मयाःसां निर्णय यायेगु लागिं आपालं लुखा धाःसा चायेका बिउगु खँ सूत्रं धाःगु दु ।
भुइजःसिस्थित कर्ण शाक्यया पार्क भिलेजय् सुथय् प्यघौ लगातार च्वंगु बैठकय् आपालं खँय् सहमति जूसां निर्णय हे याये मफुगुया मू कारण धाःसा माओवादीया आन्तरिक कचवं खः धाःगु दु। माओवादीया संस्थापन पक्ष सहमति यायेत तयार जुइधुंकूसां उपाध्यक्ष मोहन वैद्य पक्षं शान्ति प्रक्रियायात छगू जक पक्षं समाधान याये दइ मखु, उकियात प्याकेज दयेकाः शान्ति प्रक्रिया व संविधान लेखनया प्याकेज हे दयेकाः समाधान यायेमाः धकाः अडान कायेवं बैठकं छुं निर्णय याये मफुगु खः ।
बैठकय् माओवादीपाखें अध्यक्ष प्रचण्ड नापं मोहन वैद्य व सीपी गजुरेल नं दुथ्याःगु खः। वय्कःपिंसं शान्ति प्रक्रियायात सेना समायोजन व संविधान लेखनलिसे स्वानाः छगू हे प्याकेजं समाधान यायेमाःगु अडान काःगु खः। सूत्रया कथं थौंया बैठकं छुं निर्णय याये मफयेवं कन्हय् सनिलय् ४ बजे प्रधानमन्त्री निवास वालुवाटारय् हानं स्वंगू दलया शीर्ष नेतातय्गु बैठक च्वनेगु सहमति जूगु दु। पार्टी नेतातय्सं थौं माओवादीं थुकिया लागिं आन्तरिक तयारी यानाः कन्हय्या बैठकं ठोस निर्णय याइगु आशा याःगु दु ।
थौंया बैठकय् सत्य निरुपण तथा मेलमिलाप आयोग व बेपत्ता छानबिन आयोग गठन यायेगु खँय् नं सहलह जूगु खः। वैद्य पक्षं आः निर्णय यायेबलय् थुपिं खँतय्गु नं निर्क्यौल जुइ कथंया सहमति जुइ कथंया निर्णय जुइमाः धइगु माग न्ह्यःने तःगु खः। थौंया बैठकं छुं निर्णय मयाःसां बैठक न्हापा लिपा स्वयां गाक्कं सकारात्मक जूगु व कन्हय् छुं निर्णय पिहां हे वइगु टिप्पणी नं नेतातय्सं याःगु दु ।
'बहुमतीय प्रणालीं हे निर्णय जुइ'
अर्थमन्त्री वर्षमान पुनं शान्ति व संविधान बारे निर्णय यायेत पार्टी दुने पिहां वयाच्वंगु कचवंयात यदि संवादपाखें समाधान याये मफुत धाःसा मतदान यानाः बहुमत-अल्पमत प्रणालीपाखें जूसां समाधान याये मालीगु अवस्था वयेफुगु खँ कनादीगु दु। लिसें वय्कलं कर छले याःपिं ब्यापारीतय्त कारवाही यायेगु प्रतिबद्धता नं प्वंकादीगु दु। थौं सुथय् क्रान्तिकारी पत्रकार संघं नेपालगञ्जय् याःगु पत्रकार सम्मेलनय् वय्कलं अथे धयादीगु खः। वय्कलं चीनलिसे व्यापार वृद्धि यायेगु लागिं आः सरकारं याकनं हे चीनलिसे नं बिपा सम्झौता यायेगु खँ कनादिल ।
