विश्व नेवाः संगठनया नायः डा. बालगोपाल श्रेष्ठ
येँ (सन्ध्या टाइम्स)/वंगु शनिवाःनिसें थौं सुथय् तक बेलायतया लन्डनय् न्ह्याःगु न्हापांगु विश्व नेवाः सम्मेलनं सर्वसम्मति कथं डा. बालगोपाल श्रेष्ठयात विश्व नेवाः संगठन 'वर्ल्ड नेवाः अर्गनाइजेशन - (डब्लुएनओ)' या नायः पदय् ल्यःगु दु ।
'लन्डन वने नु, झीगु सः हलिमय् थ्वयेके नु' धइगु नारा बियाः याःगु विश्व नेवाः सम्मेलनं अर्गनाइजेशनया नायः पदय् ल्यःम्ह डा. श्रेष्ठ बेलायतया अक्सफोर्ड विश्वविद्यालयय् रिसर्च यानाच्वनादीम्ह खः ।
सम्मेलनं वय्कःयात नायः पदय् ल्यःगु खःसा ज्यासना पुचः धाःसा लिपा जक स्वनेगु निर्णय याःगु दु। उगु सम्मेलनं डब्लुएनओया विधान नं पारित याःगु दु। अथे हे लन्डन घोषणापत्र जारी यायेगु नितिं तयारी यायेत दया शाक्य, कृष्ण चखुं, डा. महेशमान श्रेष्ठ व डा. विजय सैंजुयात भाला बिउगु दु। लन्डन घोषणा म्हिगः जारी यायेगु ज्याझ्वः दुगु खःसां मजुल ।
पासा पुचः गुथि यूकेया संस्थापक अर्जुन प्रधानया सभापतित्वय् जूगु विश्व नेवाः सम्मेलन उलेज्या नेपालभाषा एकेडमिया चान्सलर सत्यमोहन जोशीं यानादीगु खःसा प्रा. माणिकलाल श्रेष्ठ, नेपालभाषा मंकाः खलःया नायः पद्मरत्न तुलाधर, डा. महेशमान श्रेष्ठ, नेपालभाषा केन्द्रीय विभागया प्रमुख प्रेमशान्ति तुलाधर, नेपाः राष्ट्रिय पार्टीया महासचिव विजय सैंजु नापं मेमेपिंसं नं नुगःखँ प्वंकादीगु खः ।
सम्मेलनया न्हापांगु चरणय् थीथी सफू व सीडी उलेज्या नं जूगु खःसा निन्हु कुन्हु प्राज्ञ गोष्ठी, साहित्य गोष्ठी नापं म्हपुजा नं याःगु खः ।
थ्वहे दथुइ म्हिगः यलया सातोआकी भवनय् विश्व नेवाः सम्मेलनय् थ्यने मफुपिं नेपाःया नेवाः न्ह्यलुवातय् दथुइ सहलह ज्याझ्वः नं जूगु दु। विश्वन्यंकं च्वंपिं नेवाःतय् दथुइ एकता क्वातुकेगु ताः तयाः लन्डनय् उगु नेवाः सम्मेलन जूगु खः ।
