बसया ठक्करं छम्ह सित, ११ म्ह घाःपाः
येँ (सन्ध्या टाइम्स)/येँनं वंगु यात्रुवाहक बसयात थौं सुथय् चन्द्रनिगाहापुरय् नम्बर सीके मफुनिगु छगः बसं ठक्कर नकाः घटनास्थलय् हे छम्ह यात्रु सीगु दुसा ११ म्ह घाःपाः जूगु दु ।
ना. ४ ख ३६३३ नम्बरया बसयात ठक्कर नयेवं उगु बस लँया क्वय् कुतुंवनाः दुर्घटना जूगु दु। उकी लानाः सप्तरीया २८ दँ दुम्ह आनन्दी सरदार सीगु खः। लिसें वया नापं वःम्ह च्याला दुम्ह म्ह्याय् कुसुम सरदार लगायत मोरङया हरिराज भण्डारी व मेपिं यानाः ११ म्ह घाःपाः जूगु दु। घाःपाः जूपिं मध्ये स्वम्हेसित थप वासः यायेत येँय् छ्वयाहःगु दु ।
खुकुरीं पालाः मचा स्यात
भ्वजय् विवाद जुयाः खुकुरीं पाःबलय् छम्ह मचाया ज्यान वंगु दुसा मेम्ह छम्ह घाःपाः जूगु दु। दोलखाया डाँडाखर्क लागाय् म्हिगः बहनी स्थानीय चन्द्रबहादुर विकया छेँय् भ्वय् जुयाच्वंगु इलय् ल्वापु जयाः सोमबहादुर विकनं खुकुरीं पालाः स्थानीय टुल्के बिकःया च्यादँ दुम्ह म्ह्याय् सीगु खः। उकी लानाः टुल्केया हे २४ दँ दुम्ह मेम्ह म्ह्याय् मसली विक तसकं घाःपाः जूगु दु। उगु घटनायात कयाः खुकुरीं पाःम्ह सोमबहादुर विकयात प्रहरीं ज्वनाः अनुसन्धान यानाच्वंगु दु ।
