यलय् न्हूदँया र्याली
सहभागी पुचःयात मोति सिरपाः
यल (सन्ध्या टाइम्स)/ नेपाल संवत् ११३२ न्हूदँ क्यंगु लसताय् नेपालभाषा मंकाः खलः यलया ग्वसालय् थीथी संघ संस्था, समाज, मिसा पुचःपिनिगु सहभागिताय् शंखधर साख्वाःया झ्वाता व थीथी बाजालिसें वृहत र्याली पिकयाः देय् चाःहिलेगु ज्या जुल। यलया मंगल बजार सुरु जुयाः थीथी थाय् चाःहिलाः मंगल बजारय् हे र्याली क्वचाःगु खः ।
अर्थमन्त्री लिसें यलया हे सभासद् वर्षमान पुनया प्रमुख आतिथ्यताय् जूगु उगु र्यालीइ ब्वति काःगु थीथी खलः, पुचःमध्ये उत्कृष्ट जूपिं ल्ययाः न्हाप, लिउ व लियांलिउ कथं यल उप नगरपालिकापाखें दां सिरपाः नं लःल्हाःगु खः। थुकिया लिसें सिरपाः त्याकादीपिंत जुलुसय् ब्वति काःगु थीथी संघ, संस्थां मोति सिरपाः नं लःल्हायेगु ज्या जूगु खः ।
ज्याझ्वलय् न्ववानादिसें मोति सिरपाःया दाता व नेपालभाषा मंकाः खलः यलया सल्लाहकार समाजसेवी मोतिलाल सिल्पकारं न्हूदँया भिंतुना बिसें नेपाल संवत्यात व्यवहारय् छ्यलेमाःगु खँ कनादिल। सभासद्, बुद्धिजीवी नापं थीथी वक्तातय्सं न्हूदँया लसताय् भिंतुना देछायादीगु उगु ज्याझ्वः नेपालभाषा मंकाः खलः यलया नायः किरण शाक्यया सभापतित्वय् न्ह्याःगु खः ।
