सार्वजनिक अभिनन्दनया तयारी
येँ (सन्ध्या टाइम्स)/नेपाःया ज्येष्ठतम भिक्षुपिं अश्वघोष महास्थविर नेपाःया खुम्हम्ह पूज्यपाद् संघनायक तथा आचार्य भिक्षु कुमार काश्यप महास्थविर नेपाःया संघउपनायक जुयाबिज्याःगु लसताय् वसपोलपिंत अखिल नेपाल भिक्षु महासंघपाखें तःजिक अभिनन्दन याइगु जूगु दु ।
थ्वहे वइगु कार्तिक २६ गते शनिवाः स्वयम्भुया आनन्दकुटी विहारय् छगू तःजिगु ज्याझ्वः यासें वसपोलपिंत अभिनन्दन यायेगु ज्याझ्वः तयातःगु दु।
नेपालय् थेरवादी बुद्ध शासन पलिस्था यायेगु ज्याय् वसपोलपिंसं यानाबिज्याःगु योगदानया कदर याये कथं समेत उगु ज्याझ्वः यायेत्यंगु खः। उगु अभिनन्दन ज्याझ्वलय् थीथी खलः पुचःतय्सं नं वसपोलपिंत थःपिनिपाखें अभिनन्दन पौ वा द्यछा देछाये फुगु खँ भिक्षु महासंघं धाःगु दु। तत्कालिन संघनायक भिक्षु बुद्धघोष महास्थविर मदयेवं आश्विन १४ गते वसपोलपिं छसिकथं उगु पदय् प्रतिस्थापन जुयाबिज्याःगु खः ।
