माओवादी-कांग्रेस विकसित जूगु न्हूगु स्वापू

हिला वनाच्वंगु देय्या परिस्थितिइ कांग्रेस व माओवादी छथासं च्वनीगु संकेत खने दया वःगु दु। थौंकन्हय् विकसित जुया वःगु गुलिखे अवस्थाय् कांग्रेस व माओवादीया बिचाः मिले जुजुं वःगु कारणं आः थ्व निगू पार्टी छथासं च्वने फइगु सम्भावना अप्वया वःगु खः। देशय् दिनाच्वंगु शान्ति प्रक्रिया व संविधान च्वयेगु ज्यायात न्ह्यःने यंकेगु खःसा माओवादी व कांग्रेस छथासं मच्वंकं मगाः धकाः ताः ई न्ह्यवंनिसें हे धायेगु याना वयाच्वंगु खः। संविधानसभाया चुनावं बिउगु म्याण्डेट धइगु नं वास्तवय् थथे हे खः। फुक्कं पार्टी छथाय् च्वनेगु व सकस्यां बिचाः कःघानाः संविधान दयेकेगु धइगु हे चुनावया स्पष्ट जनादेश धायेमाः। तर जनादेश अज्याःगु खयां नं कांग्रेस व माओवादी दथुइ समझदारी मजुयाः हे शान्ति प्रक्रिया व संविधान च्वयेगु ज्या न्ह्यःने यंके मफुगु खः। थ्व खँयात सकस्यां थुइकेमाः। चुनावय् माओवादीयात अप्वः सिट ला वःगु खः तर शत प्रतिशत वःगु मखु। उकिं माओवादी याकःचां चाहे जू कथंया संविधान मवइगु स्वाभाविक खः। उकी सम्झौता यायेमाःगु आवश्यक जुइ। थुलिसम्म खः कि संविधान न्ह्यागु हे वःसां उकी संघीय व्यवस्था, धर्म निरपेक्षता व लोकतान्त्रिक गणतन्त्र थेंज्याःगु आधारभूत खँ धाःसा त्वःफिके मजिल। थ्व मामिलाय् एमाले गाक्कं लचिलो व सहयोगी जूगु कारणं कांग्रेस व माओवादीया खँ मिले जुल धाःसा याकनं हे शान्ति व संविधानया ज्या नं न्ह्याः वनीगु विश्वास कायेफु। उकिं आः विकसित जूगु माओवादी-कांग्रेस स्वापूयात न्हूगु संविधान जारी मजूतले जक जूसां कायम याना तयेगु सकस्यां कर्तव्य जू वइ ।

More Stories Like this