दान्यहिरा सिरपालं विभूषित न्ह्यू वज्राचार्य

शशिकला मानन्धर

'झी झीगु निम्ति मखुसां
नेपाल निम्ति म्वायेमाः
झीपिं दु धइगु चिं हे
नेपालयागु आत्मा ....'

मन हे खुल्ल मिंक थम्हं हे गितार थानाः न्ह्यू बज्राचार्यं म्येँ हालेगु शुरु यानादिल। झी जनकवि दुर्गालाल दाइनं च्वयादीगु, 'लसय् हंगु विरोध' म्येचालय् दुथ्याःगु थ्व म्येँ न्ह्यू बज्राचार्यं लसय् हनाः हालातःगु खः। नेवाः भाय्या संगीतय् विशेष यानाः मचा म्येय् बिउगु संगीतयात कदर यासें लःल्हाःगु दान्यहिरा सिरपाः कायेधुंकाः दबुली च्वनाः न्ह्यू बज्राचार्यं नं म्येँ हालादीगु खः ।

न्ह्यूया संगीतय् मचा म्येँचाः 'चुलिचिया चंचं' छब्व व निब्व पिदंगु दु। उकी मध्ये 'हे माकः जंगली माकः, मिखामाखा प्वाकः, न्हाय्न्हिं छ्याकः, स्वयेमते आमथे मन हे ग्याक' बोलया म्येँ अतिकं बय्बय् जूगु म्येँ खः। मेगु म्येचाःत खः - छंत लुमंकाः, मय्जुलानी झ्याः, जः मालाच्वंगु सः, जिगु थ्व ख्वबि, 'राजमति' संकिपाया म्येँ, मतकलः अले संगीत संयोजन याःगु म्येँचाः खः - लसय् हंगु विरोध व किचः ।

नेवाः भाय् जक मखु, वय्कलं मेमेगु भाय् गथे कि, नेपाली, हिन्दी, इंग्लिस, तिब्बती व संस्कृत भासं नं अथे हे न्यासःति म्येँ लसय् हनादी धुंकूगु दु। उकी मध्ये छपु नेपाली भाय्या म्येँ आनी छोइङं हालादीगु 'फूलको आँखामा फूलै संसार' तसकं लोकंह्वात। लिसें म्येँ च्वमि दुर्गालाल, संगीतकार न्ह्यू बज्राचार्य अले गायिका आनी, स्वम्हेसिगु नां नापनापं बय्बय् जुल। थ्व म्येँ ७ मिनेटया दुने तयार जूगु जुयाच्वन। न्ह्यूं लय न्यंकल, आनीया ख्वाः स्वस्वं दुर्गालाल दाईयाके भाव दनावल, गुकियात सलं व्यक्त यानादिल अले न्ह्यूं ल्ह्यया काल। थुकथं छगः आखः हे च्वये म्वाय्क झी दुर्गालाल दाई नेपाली भाय्या नं नांजाःम्ह गीतकार जुयादिल, न्ह्यूया हे संगीतं ।

वि.सं. २०२० साल आश्विन महिनाय् ओमबाहाः त्वालय् बूम्ह न्ह्यूया बौ खः - नेपालभाषाया छम्ह नांदंम्ह च्वमि, दिवंगत परमानन्द बज्राचार्य। अले मां खः - च्वमि कृष्णदेवी बज्राचार्य। थुलि धयां मगाःनि, पुनर्जागरण कालया प्यंगः थां मध्ये छगः थां, गद्यगुरु निष्ठानन्द बज्राचार्यया उइ खः, न्ह्यू बज्राचार्य। न्ह्यूया दाजु पवित्र, तता नगिना, भिन्चापिं लसता व भिंतुना तकं नेपालभाषाया ख्यलय् दु। थुकथं घाँय्घाँय् बाज्या निष्ठानन्दंनिसें सन्ततिपिंसं तक नेपालभाषायात माया यायेगु परम्परा न्ह्यानां तुं वनाच्वंगु दु। थ्व तसकं च्वछाये बहःगु खँ खः ।

आइकम तक ब्वनाः पियानो व गितार बादनय् विशेष तालिम कयादीम्ह न्ह्यूं जमलय् 'डो रे मि' नांगु संगीत पाठशाला चायेकादीगु दु। संगीत ख्यःयात ईकथं न्ह्याका यंकेत वय्कलं पूर्व व पश्चिम आधुनिक म्येँया अध्ययन नं यानादीगु दु ।

वि.सं. २०३१ सालंनिसें नेपालभाषाया संगीत ख्यलय् पलाः न्ह्याकूम्ह न्ह्यू, आः वयाः नेपाली भाय्या संगीत ख्यलय् नं संगीतकारया रुपय् बय्बय् जुयादीधुंकल। थीथी सिरपालं वय्कः विभूषित जुयादीधुंकल गथेकि रेडियो नेपालया ग्वसालय् वि.सं. २०४५ सालय् जूगु राष्ट्रिय स्तरया आधुनिक म्येँया दकलय् बांलाःम्ह संगीतकार, नारायण गोपाल युवा संगीत पुरस्कार, छिन्नलता पुरस्कार, शिव शंकर संगीत पुरस्कार, चलचित्र सम्मान, हिट्स एफ.एम. व इमेज एवार्ड ।

जितः बांलाक लुमंनि, न्हापा त्वाःत्वालय् जुइगु सांगीतिक ज्याझ्वलय् मचाम्ह न्ह्यूं माउथ आर्गन पूगु लु। व मचाम्ह न्ह्यू ल्याय्म्ह जुल, आः पीच्यादँया वैंशय् थ्यन, संगीत नं वैशया लिउलिउ हे वयाच्वंगु दु। नेपालभाषा एकेडेमिं लःल्हाःगु ने.सं. ११३१ या दान्यहिरा सिरपालं विभूषित न्ह्यूया वैंश लिसलिसें संगीत नं लिउलिउ वनाच्वंगु लिपा तकं न्यने दयेमा धकाः मनंतुने ।

अन्तय् धाये, दबुली म्येँ हालेगु झ्वलय् थः मामं च्वःगु म्येँ छपु नं हालादिल। कायं थःगु म्येँ हाःबलय् मां कृष्णदेवीया नुगः लसतां भय्भय् बिउगु खनेदु। गितारया धूनय् संगीतकार जक मखु गायक न्ह्यू बज्राचार्यया यइपुगु सः हाकनं जिगु न्हाय्पनय् धुन्न थ्वयावल, मन खुल्ल मिंगु लसय् -
'नेपाल धइगु खाली मखु पूर्व मेची काली
बरु खः व फय् गुकी दु, जातीय गर्व लाली
झीसं पलाः छिनाःथाय् नेपाल स्वान ह्वय्मा
सासः पतिं फसय् नं नेपाल हे नस्वाय्मा ।'

More Stories Like this