विश्व नेवाः सम्मेलन बारे नेपालय् सहलह

शनिवाःनिसें बेलायतया राजधानी लण्डनय् न्हापांगु विश्व नेवाः सम्मेलन न्ह्यात। नेपालं झाःम्ह वरिष्ठ संस्कृतिविद् सत्यमोहन जोशीं उगु सम्मेलनया उलेज्या यानादीगु खः। लण्डनय् सम्मेलन जुयाच्वंगु हे इलय् म्हिगः कुपण्डोलया सातोआकी भवनय् नेपालय् च्वंपिं थीथी ख्यःया नेवाः व्यक्तित्वपिनि दथुइ सहलह ज्याझ्वः जुल। विश्व नेवाः सम्मेलन ग्वसाः ग्वःगु वर्ल्ड नेवाः अर्गनाइजेशनया लिउनायः सुवन् वज्राचार्यया सभापतित्वय् जूगु उगु सहलह ज्याझ्वलय् थीथी व्यक्तित्वतय्सं प्वंकादीगु बिचाःया सार थन न्ह्यब्वया।

मल्ल के. सुन्दर:
संगठन दयेकेगुली नेवाःत सुं स्वयां लिउने मलाः। तर नेवाःतय् संगठनया स्थायित्वय् धाःसा न्ह्याबलें नं न्ह्यसः दनाच्वनी। संगठन दयेकेधुंकाः व प्रति थःगु 'अपनत्व' या भावना विकास मजू। थ्व दकलय् मदयेक मगाः। संगठन दयेकेधुंकाः अन उकियात न्ह्याकीगु मानवीय स्रोत माः। अले ज्याझ्वःत याइबलय् नं अथें हाहालय् लगे जुयाः मखुसें मुद्दाया आधारय् यायेमाः। छु मुद्दाय् थःपिंसं छु ज्याझ्वः यायेगु व गज्याःगु पलाः छीगु धइगु खँ क्वःछिनाः निर्णय जुइमाः। थौंया समसामयिक अवस्थायात स्वयाः धायेगु खःसा नेवाः स्वायत्त राज्यया मुद्दायात विश्व नेवाः सम्मेलनं त्वःफिके हे मजिउ ।

लक्ष्मण राजवंशी:
लण्डनय् थौं विश्व नेवाः सम्मेलन जुयाच्वंगु दु, थ्व बांलाःगु खँ खत। तर थ्व सम्मेलनया मू उद्देश्य छु? थ्व सी मदु। जिं सिउ कथं उकी स्वंगू हे जक ज्याझ्वः तयातःगु दु, उलेज्या, लण्डन घोषणा जारी यायेगु व साइट सीन स्वयेगु। थुकी नं मू ज्या धइगु ला लण्डन घोषणा जारी यायेगु छगू हे जक खः। धायेबलय् थ्व छन्हुया हे जक कार्यक्रम जुल। छन्हुया कार्यक्रमय् ब्वति कायेत छाय् लखौं दां फुकेगु धकाः जि लण्डन मवनागु खः। हानं जिं न्यना, अन नं नेवाः संगठन छगू जुयाच्वंगु मदु। टुक्रा टुक्रा जुयाच्वन हं। थ्व खँयात सुधार यानाः वने माल ।

नरेश ताम्राकार:
लण्डनय् जुयाच्वंगु विश्व नेवाः सम्मेलन नेवाःतय् लागिं छगू कोश ल्वहं हे खः। थुकिया उद्देश्य छु धइगु स्पष्ट मजू। तर थ्वं नेवाः स्वायत्त राज्य प्राप्त यायेगु ज्यायात हे थःगु मू उद्देश्य दयेकेमाः। भारतय् खालिस्तान स्थापनाया आन्दोलन जूबलय् विश्वन्यंकंया सिखतय्सं उकियात ग्वाहालि याःगु खः। विश्वया नेवाःतय्सं नं नेवाः आन्दोलनयात उकथं हे ग्वाहालि यायेमाः ।

डा. केशवमान शाक्य:
न्हापांगु सम्मेलन जूगुलिं थ्वपाखें यक्व आशा याये मजिउ। पिने च्वंपिं नेवाःतय्सं नेपालय् नेवाःतय्सं यानाच्वंगु राजनीतियात समर्थन यानाच्वंगु दु। थौं नेपाःया आपालं जनता देशं पिने च्वनाच्वंगु दु। उकी नेवाःत नं आपालं च्वनाच्वंगु दइ। पिने च्वंपिं नेवाःतय्सं नेपालं विदेश वंम्ह अरनिकों नं कला सम्पदाया ज्या यानाः अथवा सिंहसार्थबाहुं थें सामाजिक ज्या यानाः नेवाःतय् म्हसीका पित बी जिउ। थथे छुं नं एजेण्डा मदयेक संस्था दयेकल धाःसा थ्व छगू क्लब थें जक जू वनी ।

डा. चुन्दा वज्राचार्य:
विश्वन्यंकंया नेवाःतय्सं थौंकन्हय् नेपाःया सम्पदात गुगु स्यंकेगु ज्या जुयाच्वंगु दु उकियात पनेगु लागिं खबरदारी यायेगु ज्या जुइमाः। नेवाः राज्य पलिस्था यायेगु लागिं नं विश्वन्यंकं नेवाःतय्सं सः तयेमाः। आः निदँ लिपा जुइगु विश्व नेवाः सम्मेलन नेपालय् दुने हे यायेमाः। नेपाः दुने नं पुलांपिं गोपाली नेवाःतय्सं बसोवास यानाच्वंगु पालुङ थेंज्याःगु थासय् उगु सम्मेलन यायेफुसा उकिया अझ सार्थकता दइगु खः ।

नरेशवीर शाक्य:
न्हापांगु विश्व नेवाः सम्मेलन नेपालय् हे यायेमाः धकाः सुरुंनिसें धयाच्वनागु खःसां लण्डनय् जू वन। ठीक हे जू। तर थ्व सम्मेलनय् नेपाःपाखें सुयां हे संस्थागत प्रतिनिधित्व मजुल। थथे यायेबलय् सुयात गज्याःगु लिच्वः लाकीगु खः बिचाः यायेमाः। विदेशय् च्वंपिं नेवाःतय्सं येँय् च्वंपिं नेवाःतय्त थीथी मुद्दाय् आलोचना यानाः लाथपाथे धायेगु याना हयाच्वंगु नं झीसं खनाच्वना। थुकियात सुनां गुकथं संयोजन यायेगु? थुकियात थुइकेमाल। आः निक्वःगु सम्मेलन नेपालय् जुइबलय् उकियात उलेज्या नेपाःया राष्ट्रपतिया ल्हातं जुइमाः ।

प्रा. प्रकाश महर्जन:
जि वंगु ३२ दँनिसें जापानय् च्वनाः थौंन्हय् हिरोशिमा अन्तर्राष्ट्रिय विश्वविद्यालयय् अध्यापन यानाच्वना। अथे खःसां जिं थौं तक थःगु नेवाः भाय् त्वःतागु मदुनि। जि थेंज्याःपिं मनूतय्गु लागिं विश्व नेवाः सम्मेलनया तःधंगु अर्थ दु। थ्व सम्मेलन छाय् याना? आज्जु छु? आज्जुइ थीत छु यायेमाः? अले झीसं छु यानाच्वना धइगु सीकाः ज्या याना वनेमाःगु आवश्यक दु ।

किरण शाक्य:
नेपालय् स्वायत्त नेवाः राज्य पलिस्था यायेगु आन्दोलन जुयाच्वंगु इलय् लण्डनय् थ्व विश्व नेवाः सम्मेलन जुयाच्वंगु दु। अर्थात थौंया छगू संगीन इलय् थ्व सम्मेलन जुयाच्वंगु कारणं थ्व सम्मेलन थ्व मुद्दापाखें बिस्कं जुइ फइ मखु। सम्मेलनपाखें देशय् विकसित जुयाच्वंगु थ्व अवस्थायात नं ध्यानय् तयाः पलाः न्ह्याकल धाःसा थ्व तसकं सकारात्मक जुइ धइगु तायेका ।

सुजीव वज्राचार्य:
विश्वया नेवाःतय्सं भावनात्मक रुपं जक मखु खने दयेक हे नेपाःया नेवाःतय्त ग्वाहालि यानाः क्यनेमाःगु दु। गथे कि नेवाःतय्गु थःगु हे टीभी स्टेशन तयेगु ज्याय् ग्वाहालि यायेगु। थ्व सम्मेलनं नेवाःतय् लागिं नेवाः स्वायत्त प्रदेश माः धकाः निर्णय यानाः क्यनेमाः, थुकिं नेपालय् च्वंपिं नेवाःतय्त नं उत्साहित याइगु खँय् शंका मदु ।

सुरेश किरण मानन्धर:
विश्वन्यंकंया यहुदीतय्सं इजरायल धाःगु चीधंगु देशयात गुकथं ग्वाहालि यानाः बल्लाका तःगु खः, विश्वन्यंकंया नेवाःतय्सं नं नेपालमण्डलयात उकथं हे ग्वाहालि यानाः बल्लाकेगु व प्रगति याकेगु धकाः उद्देश्य तःसा न्ह्यःने वनेगु छपु लँपु लुया च्वनीगु खइ ।

सुवन वज्राचार्य:
(ग्वसाः खलः, सभापति)
थन छिकपिंसं न्ववानादीगु थ्व फुक्कं बिचाःयात लण्डनय् न्यंकेगु जुइ। छिकपिंसं बियादीगु सुझावयात फयांफछि फुक्कं नाला कायेगु हे जुइ। झीस फुकसिगु ग्वाहालिं सम्मेलन सफल जुइ ।

More Stories Like this