विश्व नेवाः संगठनया नायलय् डा. बालगोपाल श्रेष्ठ सर्वसम्मत

ताः ई न्ह्यःनिसें नेपालभाषा ख्यलय् सक्रिय जुयाच्वनादीम्ह डा. बालगोपाल श्रेष्ठ विश्व नेवाः संगठनया नायः पदय् सर्वसम्मतिं ल्यःगु दु ।

'लण्डन वनेनु, झीगु सः हलिमय् थ्वयेकेनु' धइगु नारा ज्वनाः संचवाः निसें लण्डनय् न्ह्याःगु विश्व नेवाः सम्मेलनं श्रेष्ठयात नायः पदय् सर्वसम्मतं ल्यःगु खः । श्रेष्ठ बेलायतया अक्सफोर्ड विश्वविद्यालयय् रिसर्च यानाच्वनादीम्ह खः । सम्मेलनं वय्कःयात नायः पदय् ल्यःसां कार्यसमिति धाःसा लिपा जक गठन यायेगु निर्णय याःगु दु ।

अथेहे सम्मेलनं विश्व नेवाः संगठनया विधान नं पास याःगु दुसाः लण्डन घोषणापौ जारी यायेत प्यम्ह दुजः दुगु छगू समिति नं नीस्वंगु दु । घोषणापौ तयार यायेत दया शाक्य, कृष्ण चखुं, डा. महेशमान श्रेष्ठ व डा. विजय सैंजुयात जिम्मा बिउगु दु ।

नेपाःपाखें मू पाहाँ कथं झायादीम्ह संस्कृतिविद् सत्यमोहन जोशीं उलेज्या यानादीगु विश्व नेवाः सम्मेलनय् नेपालभाषा मंकाः खलःया नायः पद्मरत्न तुलाधरं विश्व नेवाः सम्मेलन नेवाःतय् निंतिं छगू न्हूगु इतिहास जूगु खँ न्ह्यथनादीगु खः ।

पासा पुचः गुथि, यूकेया संस्थापक अर्जुन प्रधानया सभापतित्वय् जूगु न्हापांगु न्हिया ज्याझ्वलय् नेपाःपाखें झायादीपिं प्रोफेसर माणिकलाल श्रेष्ठ, डा. महेशमान श्रेष्ठ, नेपालभाषा केन्द्रीय विभागया प्रमुख प्रेमशान्ति तुलाधर लगायतं थःथःगु नुगः खँ प्वंकादीगु खः ।

न्हापांगु न्हिया न्हापांगु चरणय् थीथी सफु व सीडीया उलेज्या जूगु खःसा निन्हुया न्हि कुन्हु प्राज्ञ गोष्ठी, साहित्य गोष्ठी नापं म्हपुजा नं जूगु खः ।

थ्वहे दथुइ विश्व नेवाः सम्मेलनय् नेपाःपाखें ब्वति कायेमफुपिं नेवाः न्ह्यलुवाःतय् बिचाः टेलिकन्फरेन्स मार्फत उखे छ्वयेगु ज्या जुल । विश्व नेवाः संगठन तदर्थ समितिया न्वकु सुवर्ण वज्राचार्यया सभापतित्वय् आइतवाः यलया सातोआकी भवनय् जूगु ज्याझ्वलय् नेवाः न्ह्यलुवाःतय्सं थःथःगु नुगः खँ प्वंकादीगु खः ।

ज्याझ्वलय् नेवाः देय् दबूया नायः नरेश ताम्राकार, संरक्षकपिं लक्ष्मण राजवंशी व मल्ल के. सुन्दर, नेपाः राष्ट्रिय पार्टीया नायः डा. केशवमान शाक्य, नेपालभाषा मंकाः खल:, येंयाया छ्याञ्जे नरेशवीर शाक्य, नेपालभाषा मंकाः खल:, यलया नायः किरण शाक्य, नेवाः जागरण मञ्चया सुजीव वज्राचार्य, सन्ध्या टाइम्स न्हिपौया सम्पादक सुरेश मानन्धर, डा. चुन्दा बज्राचार्य, केशव महर्जन लगायतं विश्व नेवाः संगठनं ज्वनेमाःगु आज्जु व हाथ्याया बारे न्ववानादीगु खः ।

More Stories Like this