कांग्रेस व एमालेया छगू हे मत
येँ (सन्ध्या टाइम्स)/शान्ति प्रक्रिया पूवंकेगु सवालय् नेपाली कांग्रेस व एमालेया शीर्ष नेतातय्गु दथुइ छगू हे मत जूगु दु। एकीकृत माओवादीं लडाकु समायोजन मयाःतले गुगु नं हालतय् विश्वास मयायेगु नापं लडाकु समायोजनया ल्याःया सवालय् नं निगू दलया शीर्ष नेतातय्गु दथुइ छगू हे मत जूगु दु ।
थौं सुथय् एमालेया सिंहदरवारय् च्वंगु संसदीय दलया ज्याकुथिइ निगू दलया शीर्ष नेतातय्गु दथुइ सहमति जूगु खः। इमि दथुइ शान्ति प्रक्रियायात प्याकेजय् हे पूवंकेगु, न्याद्वःम्ह जक लडाकुयात समायोजन यायेगु धकाः नं सहमति जूगु खः। तर माओवादीं धाःसा न्हय्द्वः हे समायोजन यायेमाः धयाच्वंगु दु। बैठकय् कांग्रेसया सभापति सुशील कोइराला, रामचन्द्र पौडेल, एमालेया अध्यक्ष झलनाथ खनाल नापं नेतातय्सं ब्वति कयादीगु खः ।
थौं सुथय् च्वनेगु धयातःगु स्वंगू दलया शीर्ष नेतातय्गु बैठक एकीकृत माओवादीया आन्तरिक सहलह मगाःनिगु कारणं धकाः स्थगित याःगु दु। थौं हे बहनी स्वंगू दलया शीर्ष नेतातय्गु दथुइ शान्ति प्रक्रिया पूवंकेगु सवालय् बैठक च्वनीगु नापं उगु बैठकय् कांग्रेस व एमालें छगू हे मत जुयाः खँ तयेगु धकाः तकं सहमति जूगु खः ।
कांग्रेसं निर्णय हे यानाः शान्ति प्रक्रिया पूमवंकं संविधान च्वयेगु ज्या मन्ह्याकेगु धकाः अडान तःगु नापं माओवादीया हे बरिष्ठ उपाध्यक्ष मोहन बैद्य किरण पक्षधरं शान्ति प्रक्रिया व संविधान निर्माणया ज्या नापनापं यायेमाः धकाः अडान तयाच्वंगुलिं माओवादीया अध्यक्ष प्रचण्ड व प्रधानमन्त्री डा. बाबुराम भट्टराईयात थाकुयाच्वंगु खः ।
माओवादी दुने महरा मध्यस्थकर्ता
एकीकृत माओवादीया दुने लाइन संघर्ष तच्वया वनाच्वंगु अवस्थाय् स्थायी समितिया दुजः कृष्णबहादुर महरा मध्यस्थकर्ता जुयादीगु दु ।
वइगु १७ गते केन्द्रीय कमिटीया बैठक च्वने न्ह्यः हे शीर्ष नेतातय्गु दथुइ सहमति ब्वलंकेगु निंतिं महरां मध्यस्थकर्ताया भूमिका म्हितादीगु खः। थ्व हे झ्वलय् थौं सुथय् थःगु हे निवास सुकेधाराय् शीर्ष नेतातय्त सःता सहलह ब्याकादीगु खः ।
उगु सहलह ज्याझ्वलय् माओवादीया अध्यक्ष प्रचण्ड, उपाध्यक्ष मोहन बैद्य किरण, महासचिव रामबहादुर थापा बादल, सचिव सीपी गजुरेल, स्थायी समिति दुजः देव गुरुङ व नेत्र विक्रम चन्दपिं सहभागी जुयादीगु खः। सहलह जुयाच्वंगु हे इलय् अध्यक्ष प्रचण्ड पिहां वनादीगु खःसा अनं लिपा किरण पक्षधरया नेतातलिसे महरां ब्यागलं कथं खँ ल्हानादीगु खः ।
न्हापा अध्यक्ष प्रचण्ड पक्षधर धकाः धयातःम्ह नेता महरा लिपांगु इलय् वयाः किरण पक्षलिसे सतिना वनाच्वंगु दु धकाः धाःसां वय्कः स्वयम थम्हं धाःसा मध्यमार्गी जुयाः भूमिका म्हिताः वयाच्वनागु धकाः दावी यानाः वयाच्वंगु दु ।
