प्रधानमन्त्री भट्टराईपाखें नेवाः भासं संवोधन
येँ (सन्ध्या टाइम्स)/नेपाल संवत् ११३२ कछलाथ्व पारु। थ्व न्हि नेपाल संवत्या न्हूदँ हनेगु ज्याझ्वःया इतिहासय् जक मखु समग्र नेपाःया इतिहासय् हे छगू कोशल्वहं साबित जुल ।
उकुन्हु प्रधानमन्त्री डा. बाबुराम भट्टराईनं न्हूदँया लसताय् खुलामञ्चय् जूगु सभाय् नेवाः भासं संवोधन यानादीगु खः। नेपाःया सुं नं बहालवाला प्रधानमन्त्रीं गुगुं नं सार्वजनिक समारोहय् खस नेपाली व विदेशी भाय्यात त्वःताः नेपाःया हे गुगुं मेगु राष्ट्र भासं संवोधन याःगु थ्वहे न्हापांखुसी खः।
प्रधानमन्त्री भट्टराईनं उकुन्हु लिखित भाषण ब्वनादीगु खः। तर मसः मसः ब्वनादीगु खःसां उकिया जोश धाःसा गुगुं कथं पाः मजू। उकुन्हु वय्कलं न्ववानादीबलय् हरेक वाक्यपतिकं स्वकुमितय्सं तालि व भुस्याः थानाः लसकुस याःगु खः ।
प्रधानमन्त्री भट्टराईनं उकुन्हु नेवाः भासं संवोधन यानादी धइगु खँ ग्वसाः खलःयात तकं गोप्य यानातःगु खः।
सूत्रं धाः कथं प्रमपाखें वयां निन्हु न्ह्यः नेपाल संव्तया बारे गुगु निर्णय यानादीगु खः उकियात कयाः पिहां वःगु सकारात्मक प्रतिक्रियापाखें उत्साहित जुयाः वय्कलं न्हूदँया मू ज्याझ्वलय् नेवाः भासं संवोधन यायेगु मानसिकता दयेकादीगु खः। थुकी वय्कःयात साथ बियादीगु खः वय्कःया थःहे तिरिमय्जु हिसिला यमि व महान्यायाधिवक्ता भाजु मुक्ति प्रधानं ।
प्रधानं च्वयादीगु थीथी भाषणयात लक्ष्मीपुजा कुन्हु बहनी गहन अध्ययन यानाः 'फाइनल' यायेगु ज्या जूगु खः। उगु भाषण च्वयेगु लागिं धाःसा प्रधानं नेपाल संवत् आन्दोलनया थीथी न्ह्यलुवापिंके बिचाः कयादीगु खः।
तिरिमय्जु यमि व महान्यायाधिवक्ता प्रधानं न्हूदँ कुन्हु नेवाः भासं हे संवोधन याःसा बांलाइ धकाः बिचाः तयादीबलय् प्रम भट्टराई रोमाञ्चित जुयादीगु खँ सूत्रं कंगु दु ।
प्रधानमन्त्री भट्टराईनं नेवाः भासं संवोधन यानादीगु खँयात कयाः न्हूदँ समारोह समितिया नायः पद्मरत्न तुलाधरं 'सन्ध्या टाइम्स' यात कनादिल, 'प्रधानमन्त्रीया भाषणं यानाः थौं तसकं न्ह्यइपुल। सकस्यां कुतलं यानाः ज्याझ्वः नं अति हे सफल जुल।' समारोहय् स्वय्म तुलाधरजुं नं अतिकं उत्तेजक भाषण बियादीगु खः ।
