भिंतुना कालबिल लिसें आर्थिक ग्वाहालि
येँ (सन्ध्या टाइम्स)/नेपाल संवत् ११३२ न्हूदँ क्यंगु लसताय् वज्राचार्य क्लबं आः नकतिनि भिंतुना कालबिल ज्याझ्वःया लिसें बज्रशील महाविहार इकु बहाःया क्वापाछेँ जीर्णोद्वारया निंतिं आर्थिक ग्वाहालि बिउगु दु ।
थुगुसी जुगःचःर्हे कुन्हु क्लबया सक्रियताय् पञ्ज्रां फयेगु झ्वलय् मुंकूगु ५०,०००/- तका दां लःल्हाःगु खः। क्लबया नायः बिप्लब वज्राचार्यया ज्याझ्वलय् पाहां कथं इकुबहाया थाकुलि सप्तरत्न वज्राचार्य, क्लबया पुलाम्ह अध्यक्ष शैलेन्द्र वज्राचार्य, बज्रशील महाविहार संरक्षण समितिया उपाध्यक्ष शिलमान वज्राचार्य व छ्याञ्जे ज्योति वज्राचार्यपिंसं थःथःपिनिगु नुगः खँ प्वंकादीगु खः। क्लबया नायः वज्राचार्यं बज्रशील महाविहार संरक्षण समितिया उपाध्यक्ष शिलमान वज्राचार्ययात महाविहार जीर्णोद्वारया दां लःल्हाःगु खः। उगु हे ज्याझ्वःया दथुइ सवल बहाःया दिपकहर्ष वज्राचार्य व इकुबहाःया रुपस्कन्धमुनि वज्राचार्यं नं महाविहार जीर्णोद्वारया निंतिं म्हतिं न्यय्द्वः तका दां ग्वाहालि कथं बीगु बचं बियादीगु खः। क्लबया दुजः आकाशा वज्राचार्यं लसकुस यानादीगु खः ।
