खोनाय् न्हूदँया लसताय् नसंचा उलेज्या
खोना (सन्ध्या टाइम्स)/ नेपाल संवत् ११३२ न्हूदँया लसताय् लिधंसा पासा पुचःया ग्वसालय् न्हूदँ भिंतुना नसंचा उलेज्या जुल। सल्लाहकार डा. देवबहादुर डंगोलया प्रमुख आतिथ्यताय् जूगु उगु ज्याझ्वलय् मेम्ह सल्लाहकार लक्ष्मीदास डंगोल, सल्लाहकार कृष्णहरि डंगोल लगायतपिंसं मंकाः कथं ज्याझ्वःया उलेज्या यानादीगु खः ।
ग्वसाः खलःया नायः शरणगोपाल डंगोलया सभापतित्वय् जूगु ज्याझ्वलय् वय्कलं हे लसकुस यानादीगु खः। सांस्कृतिक जुलुसया लिसें नसंचा उलाः खोना देय्न्यंकं र्याली वनेगु ज्या नं जूगु खः। न्हूदँया हे लसताय् लाकाः पुचःपाखें छगू भिंतुना मोटरसाइकल र्याली नं पिथंगु खः। सत्यां मल्याक मोटरसाइकलं ब्वति काःगु उगु र्यालीं खोना, येँ, यलय् चाःहिउगु खः ।
बहनि कुन्हु म्हपुजा व न्हूदँया लसताय 'लिधंसा न्हूदँ सनिल ११३२' नं न्ह्याकूगु खः। उगु ज्याझ्वः नं पुचःया नायः डंगोलया हे सभापतित्वय् न्ह्याःगु खःसा देय् थकाली मूपाहां बुलाल महर्जनं उलेज्या यानादीगु खः। ज्याझ्वलय् ग्वसाः खलःया संस्थापक दुजः साकोसयात हनापौ व पलेगां न्ययेकाः हंगु खः ।
थीथी सांस्कृतिक ज्याझ्वः नं क्यंगु खःसा लक्ष्मीपुजा कुन्हु खोना सरसफाई अभियानया ग्वसालय् सीमत च्याकाः खोना देय् चाःहिउगु खः। सीमतयाःया उलेज्या मूपाहां सभासद पम्फा भुसालं यानादीगु खः ।
