नेपाल संवत् नेवाःतय्गु जक मखु

नेपाल संवत ११३२ न्हूदँ समारोह समितिया नायः भाजु पद्मरत्न तुलाधर, थन मञ्चय् च्वनादीपिं फुक्कं पाहां भाजु/मय्जु थीथी सांस्कृतिक खलः पुचःपाखें प्रतिनिधित्व यानाः झायादीपिं सकल दाजु, किजा, तताकेहें अले बौद्धिक व्यक्तित्व व पत्रकार पासापिं लिसें फुक्कं नेपाः देय्या जनतायात नेपाल सरकार, ए.नेकपा (माओवादी) अले जि थःगुपाखें न्हूदँया लसताय् दुगुगलंनिसें भिन्तुना अले ज्वज्वलपा ।

थौ नेपाः देय्या न्हूगु दँ नेपाल संवत् ११३२ या लसताय नेपाल देय्या मू पाहां कथं जितः थन ब्वनाः थ्व समारोहय् ब्वति कायेगु अवसर बियादीगुलिं आयोजक न्हूदँ मूल समारोह समितियात जिगु यक्व यक्व सुभाय्।
नेपाः देय् छगू यक्व विशिष्ठता व विविधतां सम्पन्न, सभ्यता व पहिचान दुगु देय् खः। नेवाः जाति दुने नं उल्लेखनीय सभ्यता व पहिचान दुगु जाति खः। नेवाः जातिया उच्च चेतना, त्यागपूर्ण संघर्ष व बलिदान नेपाःया संघर्ष, आन्दोलन व युद्धया भूमिकाय् छगू उदाहरणीय खँ (जुयाच्वंगु) दु। राणा विरोधी आन्दोलन, पञ्चायत विरुद्धया संघर्ष व जनयुद्धयात तःधंगु ग्वाहालि बियाः नेपाः देय् थौ संघीय लोकतान्त्रिक गणतन्त्रया अवस्था तक थ्यंकाः शान्ति व संविधानया मू लँपु जुयाः श्रमजिवी व उत्पीडित जनताया हक अधिकारयात सुनिश्चित याइगु न्हूगु संविधान निर्माणया पक्षय् निरन्तर (रुपं नेवाः जनतां म्हिताच्वंगु) भूमिका नेपाःया ईतिहासया छगू महत्वपूर्ण पक्ष खः। नेपाल संवत्यात राष्ट्रिय संवत् जुइमाः धकाः पंचायती शासन विरुद्ध आन्दोलन यानाः झी फुक्क नेपाः देय्या आधिकारिक संवत् नेपाल संवत् खः धइगु चेतना न्ह्यःने तयाः नेपालभाषा मंकाः खलः लगायत विभिन्न खलः पुचःतय्सं म्हिता वयाच्वंगु भूमिकां नेवाः जातिया संघर्षयात नेपाःया राजनीतिक पार्टी व सरकारपाखें सम्मान यायेमाः ।

नेपाल संवत् राष्ट्रिय विभूति शंखधर साख्वालं आरम्भ यानादीगु जूसां नं थ्व संवतयात् आधिकारिक मान्यता मबिसे तयातःगु अवस्थाय् तत्कालिन प्रधानमन्त्री पुष्पकमल दाहाल 'प्रचण्ड'या नेतृत्वया सरकारं नं थ्व संवत्यात राष्ट्रिय मान्यता बीगु आधिकारिक निर्णय यात। वयां लिपा वःगु थीथी सरकारपाखें थ्व संवत्यात कार्यान्वयन यायेमाःगु खः तर कार्यान्वयनया ज्या मजू। जिगु नेतृत्वया सरकारं थ्व विषययात गंभिरतापूर्वक कार्यान्वयन यायेगु लक्ष्य अनुरुप निन्हु न्ह्यः जक शंखधर साख्वाः प्रतिष्ठानया स्थापना, नेपाल संवत् व थीथी प्रचलन दुगु संवतयात व्यवस्थित यानाः निश्चित रुपं नेपाल संवत्या प्रचलनया सवालय् ठोस नीति दयेकेगु कथं नेपाःया राजनीतिक व जातीय आन्दोलनय् सक्रिय भूमिका म्हिता वया च्वनादीम्ह भाजु पद्मरत्न तुलाधरया सयोजकत्वय् कार्यदल गठन, नेपाल संवत्यात कार्यान्वयन यायेगु झ्वलय् सरकारीस्तरं प्रकाशन जुइगु क्यालेण्डर दुने नेपाल संवतया तिथि, मिति व मासयात नं उल्लेख यायेगु, अले शंखधर साख्वाः कोष स्थापना यायेगु घोषणा सहितया निर्णय जूगु खँ नं नेपाल सरकारपाखें प्रधानमन्त्रीया हैसियतं थ्वहे समारोहया दथुइ जिं घोषणा यानागु जानकारी याना ।

नेपाल संवत्यात वास्तविक रुपं कार्यान्वयन यायेत अझ नं ज्या याये मानि। फुक्क नेपाःमि अले थ्व विषयया बांलाक ज्ञान दुपिं विशेषज्ञतय् दथुइ सहलह ब्याकाः न्ह्यःने यंकेमाः अले जक नेपाल संवत्यात मान्यता बीमाः धकाः जूगु आन्दोलन व संघर्षया मर्म व उद्देश्य पूर्ण जुइगु जिमिगु प्रतिवद्धता व सुझाव नं नेपाल संवत् ११३२ या लसताय् जूगु थ्व समारोह दथुइ प्वंकाच्वना।
नेपाल संवत् नेवाः जातिया जक संवत् मखु। थ्व संवत् नेपाः देय्या ऐतिहासिक संवत् खः। थ्व खँय् सुयातं नं भ्रम मजुइमा। चासो व सरोकार नेवाः जातिपाखें तयाः थ्व संवत्यात न्ह्यःने हयेगु पलाः छिउगु लोकतान्त्रिक आन्दोलनया हे छगू स्वरुप खः। थ्व आन्दोलनयात निरन्तर रुपं न्ह्यःने यनेमाः अले जक थ्व संवत् वास्तविक रुपं जनस्तर तक व्याप्त जुयाः फुक्कं भ्रमया अन्त जुइ ।

थौ नेपाल संवत् ११३२, न्हूदँया लसताय् झीसं थुइके माःगु खँ नेपाः देय् संघीय लोकतान्त्रिक गणतन्त्रपाखे शान्ति व संविधानया वैचारिक सहमति कथं न्हूगु संविधान निर्माणया चरणय् वनाः संघीयता, स्वशासन, राज्य पुनर्संरचना, समानुपातिक निर्वाचन प्रणाली शासकीय स्वरुप, सेना समायोजन विषययात गुलि फु याकनं निष्कर्षय् थ्यनाः संविधानया एकिकृत मस्यौदा जनताया दथुइ सहलह ब्याकेगु ज्या यानाः छगू सकारात्मक निष्कर्षय् थ्यंकेगु अहम् भूमिका म्हितादीत सकल नेवाः जातिया व्यक्तित्व व विभिन्न संघ संस्थातय्त नं इनाप यानाच्वना ।

नेपाः देय्या थीथी आन्दोलन व संघर्षय् नेवाः जातिया गौरवपूर्ण भूमिका नेपाःया राजनीतिक इतिहासया तःधंगु श्रंखलावद्ध संघर्ष ख। आः सामुन्ने वयाच्वंगु शान्ति व संविधानया ज्यायात नेवाः जातिया संगठन, संघ संस्थातय्सं सहलह ब्याकाः स्वशासन प्राप्तिया लागिं क्यनाच्वंगु प्रतिवद्धता व आन्दोलनं नेवाः जातिया छगू अग्रगामी चेतना व राज्यया नीति निर्माणया अधिकार प्राप्तीया लागिं नेवाः जातिया मुख्य माग जातीय स्वायत्तताया अवधारणायात जिमिगु पार्टी व जिगुपाखें नं पूर्ण प्रतिवद्धता व समर्थन दु। नेपाः देय् व नेपाःया उत्पीडित जनताया हितया लागिं शान्ति व संविधानया लँपुयात मजबूत जुइक ज्वनाः न्हूगु संविधान निर्माणया ज्यायात निष्कर्षय् थ्यंकाः, समृद्ध व श्रमजीवी जनता व उत्पीडित जनताया अधिकार सुनिश्चित यायेमाः। नेपाः देय् व भावी सन्ततिया भविष्ययात सुनिश्चित यानाः नेपाः देय्यात अन्तर्राष्ट्रिय प्रतिस्पर्धा तक थ्यंकेगु थ्व ज्याय् फुक्क नेपाली जनता बढे जुइमाःगु प्रतिवद्धता व्यक्त यायेत नं इनाप याना। अले नापं न्हूदँ ११३२ या लसताय् फुक्क नेपाःमियात थ्वहे सन्देश देछाये ।

हानं छक्वः न्हूदँया लसताय् भिन्तुना भिन्तुना भिन्तुना। सुभाय् !

(प्रधानमन्त्री डा. बाबुराम भट्टराईं नेपाल संवत् ११३२ न्हूदँया लसताय् वंगु न्हूदँ कुन्हु खुलामञ्चय् जूगु न्हूदँ समारोह समितिया मू ज्याझ्वलय् नेवाः भासं बियादीगु संवोधनया पूर्ण पाठ)

More Stories Like this