सुभाय् प्रधानमन्त्री डा. बाबुराम भट्टराईजु

प्रधानमन्त्री डा. बाबुराम भट्टराईं न्हूदँ ११३२ या लसताय् येँया खुलामञ्चय् जूगु न्हूदँ समारोह समितिया मू ज्याझ्वलय् सःसां मसःसां नेवाः भासं संवोधन यानाः देय्न्यंकंया नेवाःतय् नुगः त्याकादीगु दु। ताःई तक नेवाःतय् दथुइ च्वनाः संगठनया ज्या यानादीगु लिसें छम्ह नेवाःनीलिसे हे इहिपा यानादीम्ह जूगुलिं डा. भट्टराईयात नेवाः भाषा, संस्कृति व सामाजिक परिवेशया लिच्वः लानाच्वंगु मदु धाये फइ मखु। वंगु न्हूदँ कुन्हु वय्कलं गुगु नेवाः भासं संवोधन यानादिल, थ्व वय्कःयाके दयाच्वंगु नेवाः भाषा व संस्कृतिप्रतिया व हे छापया प्रतिबिम्ब खः। संवोधनया निन्हु न्ह्यः जक वय्कलं नेपाल संवत्यात सरकारी क्यालेण्डरय् नं छ्यलेगु, नेपाल संवत्या बारे अध्ययन यायेत आयोग गठन यायेगु व शंखधर साख्वाःया नामं प्रतिष्ठान नीस्वनेगु धकाः मन्त्रिपरिषद्पाखें निर्णय याकादीगु खः। उगु निर्णयपाखें लय्तायाच्वंपिं नेवाःतय् नुगः वय्कःया नेवाः भासं जूगु संवोधन न्यनाः झन् हे लय्ताःगु दु। थुकिया निंतिं प्रम भट्टराईयात न्ह्याक्व हे सुभाय् बिउसां मगाः ।

मनूतय्सं धायेफु, नेपाल संवत् नेवाःतय्गु संवत् मखु धाइ, अथे खःसा प्रधानमन्त्रीया भाषण छाय् नेवाः भासं जुल? तर प्रधानमन्त्रीं नेवाः भासं संवोधन यात धकाः मेपिं खिन्न जुइमाःगु आवश्यकता मदु। डा. बाबुराम भट्टराई व्यक्ति कथं छम्ह खय् ब्रम्हु खःसां प्रधानमन्त्री वय्कः सकस्यां खः। नेपालय् दुगु दक्वं भाषा वय्कःया लागिं समान जुइ। उकिं वय्कलं न्ह्यागु भासं संवोधन यानादीसां व सम्पूर्ण राष्ट्रयात यानादीगु संवोधन जुइ, गुगुं छगू समुदायया लागिं यानादीगु संवोधन जुइ मखु। उकुन्हु खुलामञ्चय् जूगु ज्याझ्वःया आयोजक नेवाःत खः। अले नेपालमण्डलया मू भाषा नं नेपालभाषा हे खः। वय्कलं थ्वहे खँयात कदर यासें नेवाः भासं संवोधन यानादीगु खः। थुकियात मेगु अर्थय् थुइकेगु पाय्छि जुइ मखु। नेपाःया इतिहासय् सुं नं सरकार प्रमुखपाखें सार्वजनिक रुपं नेवाः भासं संवोधन जूगु थ्वहे न्हापांखुसी खः। थुकिया लागिं भाजु भट्टराईयात सम्पूर्ण नेवाः व जाति भाषा समानताया पक्षधरतय्सं सुभाय् बीमाः। सुभाय् !

More Stories Like this