नेवाः म्युजिक भिडियोया अनगोइंग जर्नी

'न्हिला बिउ न्हिला बिउ' धकाः म्ये हालातःम्ह गायक रामकुमार साय्मि खः । नेपाल टेलिभिजनय् शांगि्रला च्यानल डे टिभिइ पिदंगु नेवाः ज्याझ्वः 'हसना'या निंतिं दयेकूगु थ्व म्युजिक भिडियोया निर्देशक विराजकाजी राजोपाध्याय खः । ने.सं. १०९९ सालया लागा दशमि कुन्हु अबु हरिओमपति राजोपाध्याय (आर.के.निर्मल) व मां बिन्दीरा राजोपाध्यायया कोखं असंया न्हाय्कंत्वालय् जन्म जूम्ह विराजकाजी राजोपाध्याय छम्ह एफ.एम. रेडियोय् ज्याझ्वः न्ह्याका वयाच्वंम्ह साचारकःमि खः । गुड नाईट एफ.एम.या नेपालभाषा ज्याझ्वलय् नेवाः भासं समाचार ब्वनाः थःगु साचार कर्म न्ह्याकूम्ह विराजं लिपा थीथी एफ.एम.य् ज्याझ्वः न्ह्याकाः अनुभव कमे याये धुंकलसा थौंकन्हय् भक्तपुर एफ.एम. १०५.४ व मैत्री एफ.एम. ९९.४ य् ज्याझ्वः न्ह्याका वयाच्वंगु दु । थुकथं साचार ख्यलय् पलाः न्ह्याका च्वंम्ह विराजकाजीं ने.सं. ११२०य् 'हसना' नेपाल टेलिभिजनं पिदंबलय् उकी मीना बज्राचार्यलिसे जानाः ज्याझ्वः न्ह्याकूगु खः । अले ज्याझ्वः न्ह्याकु न्ह्याकुं ज्याझ्वःया निंतिं म्युजिक भिडियो दयेकेगुपाखे नं पलाः च्वयेकूगु खः ।

'थुकी जितः विजय दाइ असंबरे नं यक्व हे तिबः बियाः ग्वाहालि यानादीगु खः । जितः क्यामेरा एङ्गलंनिसें कयाः मेगु सकतां माःगु खँ स्यनादीगु खः ।' धकाः थःगु नुगःखँ प्वंकादीम्ह विराजकाजीं गायक प्रमोद तुलाधरया 'खिमिला थें खिउँगु', गायक सुरेश प्रधानया 'छं य हे मयःसा', अले प्रचण्ड राजोपाध्यायया 'गब्लें गब्लें' लगायत थीथी नेवाःम्येया म्युजिक भिडियो दयेकेधुंकल । थथे म्युजिक भिडियो दयेकु दयेकुं नेवाः म्युजिक भिडियो ख्यःयात कयाः थःगु नुगलय् ब्वलना वःगु न्ह्यसःत दुवालेगु झ्वलय् लुया वःगु लिसःया लिच्वः खः वय्कः भाजुं दयेकादीगु डकुमेन्ट्री 'नेवाः म्युजिक भिडियो : द अनगोंइग जर्नी ।'

थ्व छगू नेवाः संगीत ख्यःया निंतिं हे अभिलेख खः धकाः धासें विराजकाजीं प्वंकूगु बिचाः कथं थन इतिहास न्हंकाः थः हे न्हाप लात धया जुईपं यक्व दु । अले नेवाः संगीत ख्यलय् नं अज्याःपिं आपालं दु । विशेष यानाः नेवाः म्युजिक भिडियो ख्यःया न्ह्यलुवा थः हे जुइगु कुतःयात थ्व डकुमेन्ट्रीया माध्यमं नांगां याना बीगु कुतः जुइत्यंगु खनेदु । वय्कः भाजुं थ्व डकुमेन्ट्री नेवाः संगीत प्रति मतिना दुपिंसं ला छक्वः मस्वसें मगाः धासें सकल नेवाःतय्त नं छक्वः स्वयेत इनाप यानादिल ।

थुगुसी जुयाच्वंगु स्वक्वःगु नेपाल अन्तर्राष्ट्रिय आदिवासी चलचित्र महोत्सव २००९ य् ब्वति कयाच्वंगु थ्व डकुमेन्ट्री 'नेवाः म्यजिक भिडियो : द अनगोंइग जर्नी' या न्हापांगु क्यनेज्या प्रिमियर तछलाथ्व ६ कुन्हु सुथसिया ११ ताः इलय् येँया पर्यटन बोर्डया हलय् जुइत्यंगु दुसा लिपा थुकिया भिसिडी व डिभिडी तकं पिकायेगु ग्वसाः ग्वयातःगु दु ।

विजयरत्न असंबरे

More Stories Like this