किजापुजा

सूर्यबहादुर जोशी

जाःगु कलश सुकुन्दा च्याकाः किजापुजा यायेनु।।
यमयाके आसिका फ्वनाः चिरञ्जीवि यायेनु।।१।।

ह्याउँगु चुरा, ह्याउँगु सचिका, ह्याउँगु वसः पुने नु।
तःसि, केरा, ग्वाः, ग्वय्, मसला मरिचरि कायेनु।।
ज्वाइँय च्वंगु मू सःगु अय्लाः, वहःया अन्ति कायेनु।
लागो-लापी वालु वः छुनाः ख्येँ सगं ज्वने नु।।२।।

पृथ्वी, अप, तेज, वायु, चिकं मन्दः च्वयेनु।
आख, जाकि, वा पुचः तयाः, स्वां सिन्हः तिकेनु।।
वा पुचः पतिं धुपाय् इताः जजंका नं तयेनु।
उकीया पिने ह्याउँक, म्हासुक अष्ट पद्म च्वयेनु।।३।।

जःपा पत्ति मत कलश देपा पत्ति यम।
मत नापं तुफि धंके सफू कलश नापं।।
दथ्वी तयेगु दाजु किजा न्ह्यःने तता केहेम्ह।
किजां स्वयेगु पूर्व दिशा, ततां स्वयेगु पश्चिम।।४।।

आचमनी कयाः, नुसिला बिया, पूजा सुरु यायेनु।
स्वां, सिन्हः, कीगो, धौ तयाः, क्वतः किजायात थीकेनु।।
विघ्नहर्ता गणपति पुजा न्हापां याकेनु।
विघ्न दक्व हरे यानाः सिद्धि ब्याक्क बीकेनु।।५।।

ज्ञान दयेकि नुगलय् धकाः, सुकुन्दाय् मत च्याकेनु।
अन्धकार अज्ञानयात प्रकाशं ज्ञानं फुकेनु।।
मतयात अग्नि भाःपाः पुजा अलय् याकेनु।
रुप तेज, पराक्रम वर वय्के फ्वनाः बीकेनु।।६।।

पञ्च-तत्व मिलय् जुयाः शरीर झीगु दइगु।
इलय् सयेकि, इलय् दयेकि, लोकय् नामं त्याकि।।
नां जक ल्यनी झीगु थन मेगु तत्व नापं।
पञ्च-तत्व पुजा याकाः थ्व खँ लुमन्ति बीनु।।१२।।

च्यागु दिगया नर-नारी सुखी झीसं यायेमाः।
मचाखाचा बुढाबुढी व्याकं बसय् कायेमाः।।
थ्व खँ भाःपाः अष्ट पद्मय् भैरव मातृका पुज्याकेगु।
दिग पति पुज्याय् नु, थ्व खँ लुमन्ति बियेनु।।१३।।

देवदेवी पुजा धुंकाः किजा-पुजा यायेनु।
यम-दूतं काः वइ भाःपाः चिकंचाः नं पनेनु।।
बांलाःगु वसतं पुंकेनु, नायुगु लासाय् फ्यतुकेनु।
नुसिला बियाः शुद्ध यानाः चित्त स्थीर याकेनु।।१४।।

वाल्मिकी, मार्कण्डेय थें चिरञ्जिवी सदां जु।
बाःया लिउ लिउ पालन-पोषण याइम्ह जिमित छ हे जु।।
मनं थ्व हे आसिका फ्वना धौ-सिन्हः तिकेनु।
चन्दन सिन्हः तिकेनु, त्वाःचा स्वां नं छुकेनु।।१५।।

निगू महिनाया झिंनिम्ह सूर्यं प्राणीपिंत सदां।
प्रकृति अनुसारं जः बियाः कल्याण याइ सदां।।
निःस्वार्थ भावं छं नं सदां व्याक्कसित भिं याये फयेमा।
ख्वाः दुछि दुगु झिंनिपु इता च्याकाः थ्व खँ थुइकाः बीनु।।१६।।

लक्ष्मीया अंसावतार सीतायागु कारणं।
संसारस अमर जुल जनकया नाम।।
व हे सीता जन्म जुल थ्व हे तःसि या दुने नं।
लक्ष्मी भक्ति लुमंकेत, तःसि झीसं लः ल्हायेनु।।१७।।

केरापु थें ल्हवने मा, खोसिं ख्वलाथें बल्लायेमा।
चाकुसिं थें वचन चाक्वीमा, यौवन ग्वय्स्वांथें थायेमा।।
चाकुसी, केरा लः ल्हाये नु, छाःगु खोसिं बियेनु। ग्वय्स्वांमानं क्वखाय्केनु, आसिका झीसं बियेनु।।१८।।

परब्रम्ह परात्मां नं प्राणीपिंत थन।
लोभ, तृष्णां झीगु इन्द्रिय चिनाः तल थन।।
तास, तिन्ख्वाः, पञ्चरंगी आखे न्यागः तयेनु।
झिंनिता जजंका क्वखायेकेनु लुमन्ति थ्व खं बियेनु।।१९।।

वनय् पशु दुहां वंसां, लखय् न्या दुनाः वंसां।
आकाशय् पन्छि ब्वया वंसां, जुइमखु आपत्ति छुं हे।।
उपिं थें तुं न्ह्याथाय् वंसां मजुइमा आपत्ति छुं हे।
थ्व हे मती आसिका फ्वनाः ला, न्या, ख्येँ, वः, लःल्हायेनु।।२०।।

सुसाः कुसाः त्यासा धकाः छ्यनय् चिकं तिइकेनु।
गबलें अपमान याये मखु धकाः म्हय् थियाः अन्यायेनु।।
षट्रस तयाः मरिचरि ब्वयाः भ्वय्ब्व तयाः नकेनु।
मांया माया व तताया माया भ्या हे मपा धायेकेनु।।२१।।

मत, कलश, सफू आदि देव विसर्जन याकेनु।
कलशय् च्वंगु जल कयाः अभिशेष बियेनु।।
पुज्याना तयागु तुफ मन्दः पुनाः छ्वयेनु।
किजां बिउगु ध्यबां वसः लय्लय् तायाः कायेनु।।२२।।

यमयागु मन्दलय् च्वंगु, च्याःगु मत कयाः।
मन्दलय् च्वंगु फल छगः दोना छगलय् तयाः।।
यमदूत पिहां वंगु भाःपाः दक्षिण दिशाय् वायेनु।
यमदूत लित छ्वयाः चिरञ्जीवि यायेनु।। २३।।

जाःगु कलश सुकुन्दा च्याकाः किजापुजा यायेनु।
यमयाके आसिका फ्वनाः चिरञ्जीवि यायेन।।

(थुगु चिनाखँ च्वमि जोशीया 'नेवाः भाय्या स्तोत्र व चिनाखँ' नांया सफूपाखें ल्ह्यया कयागु खः।)

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया